Superliganing 5-turi doirasida 1:1 hisobida yakunlangan “Lokomotiv” – “Qo‘qon-1912” uchrashuvidan so‘ng “temiryo‘lchilar” ustozi Andrey Miklyayev matbuot anjumanida quyidagicha fikr bildirib o‘tdi.

-"Bugun yomon o‘yin namoyish etganimiz yo‘q. Lekin qayd etilgan natija bizni umuman qoniqtirmaydi. Bir qator qulay imkoniyatlarni yuzaga keltira oldik. Ularni golga aylantirishda esa omadimiz chopmadi. Raqib esa butun jamoa bo‘lib himoyalandi.

So‘nggi paytlarda 3-4 kun oralig‘ida o‘yin o‘tkazyapmiz. Bu hozirgi zamon futbolida normal holat, desa bo‘ladi. Zero 3 kun ichida futbolchilar tiklanib, keyingi o‘yinga tayyorgarlik olib bora olishadi. Masalan, bugun biz jismoniy jihatdan raqibdan yaxshiroq o‘ynadik. Faqatgina gol kiritish masalasida oqsayapmiz.

Bilasizmi, ba’zan omad ham muhim faktorga aylanadi. Masalan, so‘nggi paytlarda o‘yin davomida ustunlik qilsak-da ba’zi uchrashuvlarda gol ura olmaganimiz sababli mag‘lub bo‘lyapmiz yoki durang o‘ynayapmiz. Umid qilamanki, bu holat tez orada o‘tib ketadi. Zero oldinda Osiyo Chempionlar Ligasi doirasidagi juda mas’uliyatli o‘yinimiz bor. Ushbu uchrashuvda g‘alabaga erishib, ishqibozlarimizni xursand qilishdan umidvormiz, - dedi tajribali mutaxassis.