Yevropa chempionlar ligasining yarim final bosqichiga yetib keldik. Ertaga, 13 aprel kuni yarim finalga qur’a tashlash marosimi bo‘lib o‘tadi. Qur’a oldidan kerakli ma’lumotlarni e’tiboringizga havola qilamiz.

Qachon va qayerda?
Qur’a tashlash marosimi 13 aprel kuni Toshkent vaqti bilan 17:00da boshlanadi. Tadbir UYEFA qarorgohi joylashgan Shveysariyaning Nyon shahrida bo‘lib o‘tadi. Mazkur marosimdan 1 soat oldin Yevropa ligasining yarim finaliga qur’a tashlanadi.

Yarim final ishtirokchilari

"Bavariya" (Germaniya)
"Liverpul" (Angliya)
"Real" (Ispaniya)
"Roma" (Italiya)

Qur’a mexanizmi
Qur’adan oldin jamoalar savatchalarga ajratilmaydi. Qur’a "ko‘r-ko‘rona" prinsipi asosida o‘tkaziladi. Nomi dastlab chiqqan jamoa yarim finalning ilk bahsini o‘z maydonida o‘tkazadi.

Qur’ani qayerda tomosha qilish mumkin?
O‘zbekistonning FUTBOL TV va UzREPORT TV, Rossiyaning Match Futbol 1 telekanllari qur’a marosimini jonli efirda translyasiya qilishni rejalashtirgan.

Qur’a jarayonida kimlar ishtirok etadi?
UYEFA mas’ul xodimlaridan tashqari Yevropa chempionlar ligasi finali elchisi — Andrey Shevchenko.

O‘yinlar qachon o‘tkaziladi?
Dastlabki o‘yinlar 24 va 25 aprel, javob bahslari esa 1 va 2 may kunlari bo‘lib o‘tadi. To‘liq taqvim qur’adan keyin aniq bo‘ladi.

Final uchun qur’a
Kiyevda o‘tadigan final bahsida nominal mezbon jamoani aniqlash uchun qo‘shimcha qur’a ham o‘tkaziladi.

Navbatdagi o‘yinlar:
Yarim final o‘yinlari: 24/25 aprel va 1/2 may
Final: 26 may, shanba, Kiyev, "Olimpiyskiy" stadioni