Европа чемпионлар лигасининг ярим финал босқичига етиб келдик. Эртага, 13 апрель куни ярим финалга қуръа ташлаш маросими бўлиб ўтади. Қуръа олдидан керакли маълумотларни эътиборингизга ҳавола қиламиз.

Қачон ва қаерда?
Қуръа ташлаш маросими 13 апрель куни Тошкент вақти билан 17:00да бошланади. Тадбир УЕФА қароргоҳи жойлашган Швейцариянинг Ньон шаҳрида бўлиб ўтади. Мазкур маросимдан 1 соат олдин Европа лигасининг ярим финалига қуръа ташланади.

Ярим финал иштирокчилари

"Бавария" (Германия)
"Ливерпуль" (Англия)
"Реал" (Испания)
"Рома" (Италия)

Қуръа механизми
Қуръадан олдин жамоалар саватчаларга ажратилмайди. Қуръа "кўр-кўрона" принципи асосида ўтказилади. Номи дастлаб чиққан жамоа ярим финалнинг илк баҳсини ўз майдонида ўтказади.

Қуръани қаерда томоша қилиш мумкин?
Ўзбекистоннинг FUTBOL TV ва UzREPORT TV, Россиянинг Матч Футбол 1 телеканллари қуръа маросимини жонли эфирда трансляция қилишни режалаштирган.

Қуръа жараёнида кимлар иштирок этади?
УЕФА масъул ходимларидан ташқари Европа чемпионлар лигаси финали элчиси — Андрей Шевченко.

Ўйинлар қачон ўтказилади?
Дастлабки ўйинлар 24 ва 25 апрель, жавоб баҳслари эса 1 ва 2 май кунлари бўлиб ўтади. Тўлиқ тақвим қуръадан кейин аниқ бўлади.

Финал учун қуръа
Киевда ўтадиган финал баҳсида номинал мезбон жамоани аниқлаш учун қўшимча қуръа ҳам ўтказилади.

Навбатдаги ўйинлар:
Ярим финал ўйинлари: 24/25 апрель ва 1/2 май
Финал: 26 май, шанба, Киев, "Олимпийский" стадиони