"Lokomotiv" – "Zob Ahan" uchrashuvidan so‘ng o‘tkazilgan matbuot anjumanida "temiryo‘lchilar" jamoasi ustozi Andrey Miklyayev hamda o‘yinning eng yaxshi futbolchisi deb topilgan Islom To‘xtaxo‘jayev ishtirok etishdi.

- Uchrashuv oson o‘tmadi. Raqibni keyingi bosqichga yo‘l olgani bilan tabriklayman. Chempionlar Ligasi – shunday jiddiy musobaqa. Unda har bir ochko qimmatli. Agar "Duhayl" bilan o‘yinda so‘nggi daqiqalarda gol o‘tkazib mag‘lub bo‘lmaganimizda balkim hozir vaziyat butkul boshqacha bo‘lishi mumkin edi. Nima ham deya olaman, bu yilgi musobaqada yigitlarimiz katta tajriba to‘plashdi. Jamoada muhit yomon emas. Yigitlar qo‘ldan kelgancha harakat qilishmoqda. Kim uchrashuvga tayyor bo‘lsa, mashg‘ulotlarda o‘zini ko‘rsatsa, o‘sha futbolchi maydonga tushadi.  Cho Suk Je o‘zini u qadar ko‘rsata olmayapti. Sherzod Karimov esa mashg‘ulotlarda yanada qattiqroq ishlashi lozim, - dedi tajribali mutaxassis.

- Bizga so‘nggi paytlarda balkim omad, balki mahorat yetishmayapti. Buni qayd etayotgan natijalarimiz ko‘rsatib turibdi. Bugun ham yigitlar imkon boricha o‘ynashdi. Umid qilamanki, hammasi hali o‘z o‘rniga tushib ketadi. Zero biz hali ichki maydonda chempionlik uchun kurashni davom ettiramiz. Jamoamiz muhit yaxshi. Yangi kelganlarga to‘liq o‘zini ko‘rsatish uchun biroz vaqt talab etiladi. Hali Cho, Karimov va Rashidov ham o‘zlarining ajoyib o‘yinlarini ko‘rsatishiga aminman, - dedi jamoa sardori.