Yurtimizda sportga, xususan, millionlar o‘yini bo‘lgan futbolning rivojiga shaxsan muhtaram Prezidentimiz Shavkat Mirziyoyev tomonidan katta e’tibor qaratilib, bu borada bir qator qarorlar qabul qilinmoqda.  

O‘zbekiston futbol assosiasiyasi rahbariyati ham Prezidentimizning e’tiborlaridan ruhlangan holda, yurtimizda futbolni yangi bosqichga olib chiqish uchun ko‘plab islohotlarni, yangiliklarni amalga oshirmoqda.

Xususan, muxlislarni stadionlarga qaytarish, ularga futbol uchrashuvlarini stadionda katta zavq bilan tomosha qilish uchun barcha shart-sharoitlar yaratilyapti. Buning natijasida esa, Superliga uchrashuvlarida stadionlar muxlislar bilan asta-sekin to‘lib bormoqda.

Avval xabar berilganidek, muhtaram Prezidentimiz Shavkat Mirziyoyev tomonlaridan “Navbahor” jamoasining fidoiy, ashaddiy futbol  muxlislariga futbolga bo‘lgan mehri sababli sovg‘a sifatida 22 ming dona futbolkalar taqdim etilgandi.

Bugun Namangan shahridagi “Markaziy” o‘yingohda Superliga 7-turidan o‘rin olgan  “Bunyodkor” jamoasiga qarshi uchrashuv oldidan stadionga tashrif buyurgan har bir jonkuyar futbol muxlislariga mazkur futbolkalar bepul tarqatilmoqda.