Юртимизда спортга, хусусан, миллионлар ўйини бўлган футболнинг ривожига шахсан муҳтарам Президентимиз Шавкат Мирзиёев томонидан катта эътибор қаратилиб, бу борада бир қатор қарорлар қабул қилинмоқда.
Ўзбекистон футбол ассоциацияси раҳбарияти ҳам Президентимизнинг эътиборларидан руҳланган ҳолда, юртимизда футболни янги босқичга олиб чиқиш учун кўплаб ислоҳотларни, янгиликларни амалга оширмоқда.
Хусусан, мухлисларни стадионларга қайтариш, уларга футбол учрашувларини стадионда катта завқ билан томоша қилиш учун барча шарт-шароитлар яратиляпти. Бунинг натижасида эса, Суперлига учрашувларида стадионлар мухлислар билан аста-секин тўлиб бормоқда.
Аввал хабар берилганидек, муҳтарам Президентимиз Шавкат Мирзиёев томонларидан “Навбаҳор” жамоасининг фидоий, ашаддий футбол мухлисларига футболга бўлган меҳри сабабли совға сифатида 22 минг дона футболкалар тақдим этилганди.
Бугун Наманган шаҳридаги “Марказий” ўйингоҳда Суперлига 7-туридан ўрин олган “Бунёдкор” жамоасига қарши учрашув олдидан стадионга ташриф буюрган ҳар бир жонкуяр футбол мухлисларига мазкур футболкалар бепул тарқатилмоқда.
