Samarqandda katta futbol bayrami o‘tkazildi. “Dinamo” jamoasi Tojikistonning “Xo‘jand” klubiga qarshi o‘rtoqlik uchrashuvini o‘tkazdi.
O‘zbekiston va Tojikiston Respublikalari o‘rtasidagi do‘stlik aloqalarini yanada mustahkamlash, ikki davlat o‘rtasida iqtisodiy-ijtimoiy sohalarda hamkorlikni rivojlantirish, ikki davlat prezidentlarining bir qator qaror va kelishuvlarning amaliy davomi sifatida Samarqand va Tojikistonning Sug‘d viloyati hokimiyatlarining hamkorlik va o‘zaro kelishuvlariga muvofiq, Samarqandda 20-21 aprel kunlari ikki viloyat o‘rtasida biznes-forum, sanoat mahsulotlari ko‘rgazmasi, madaniy dastur va futbol jamoalari o‘rtasida o‘rtoqlik uchrashuvi o‘tkazildi.
“Dinamo” – “Xo‘jand” uchrashuvidan oldin stadionda keng ko‘lamdagi obodonlashtirish ishlari olib borilib, yangi zamonaviy raqamli tablo o‘rnatildi, yoritgichlar, o‘rindiqlar yangilandi. O‘yin boshlanishiga ikki soat qolganida “Dinamo” stadioni tomoshabinlar bilan liq to‘lib, minglab muxlislar o‘yingoh tashqarisida qolib ketishdi. O‘yinga qo‘shni Tojikistondan ham katta delegasiya yetib kelgan edi, stadionda ikki davlat bayroqlari hilpirab turdi.
O‘yindan oldin har ikki davlat madhiyalari yangragach, Samarqand viloyati hokimi Turobjon Jo‘rayev va Sug‘d viloyati hokimi Rajabboy Ahmadzoda rasmiy tarzda to‘pni o‘yinga kiritib berishdi.
Ajoyib futbol atmosferasida boshlangan uchrashuvda dastlab mehmonlar ikki to‘p kiritgan bo‘lishsa, mezbonlar ikkinchi bo‘limda muvozanatni tiklashdi. Ikki mamlakat, xususan ikki viloyatning katta tadbirlari davomida bayramona bayramona o‘tgan bahsda do‘stlik g‘alaba qozondi – 2:2.
O‘rtoqlik uchrashuvi.
20 aprel (juma)
“DINAMO” – “XO‘JAND” – 2:2
Samarqand, 13 250 tomoshabin.
Gollar: Temur Ablyamitov 40, Damir Temirov 65 (pen.) - Farxod Toxirov 15, Xojiboy Ziyoyev 35.
«Dinamo»: Rustam Toshturdiyev, Hakimxon A’lamxonov, Humoyun Tolibov, Azizbek Suyunov, Daler Almosjonov, Damir Temirov, Otabek Rajabov, Damir Jabborov, Temur Ablyametov, Asadbek Tolibov, Mexroj Xudoyberdiyev.
«Xo‘jand»: Aleksey Matrosov, Sohib Hakimov, Firdavs Chakalov, Me’roj Sharifzoda, Xurshed Beknazarov, Abdusamad Xo‘jaboyev, Furqat Hasanboyev, Dilshod Karimov, Damir Azimov, Dilshod Bozorov, Farxod Toxirov.
Zaxiradan maydonga tushganlar: Dilshod Dodaboyev, Baxtiyor Choriyev, Manuchexr Axmedov, Xojiboy Ziyoyev, Jahongir Ergashev.
