“Bunyodkor” – “Lokomotiv” uchrashuvidan keyingi matbuot anjumanining birinchi qismida “temiryo‘lchilar” vakillari ishtirok etishdi.

- Uchrashuvi qiziqarli kechdi. Aniqroq aytadigan bo‘lsam, o‘yin o‘z maqomiga mos tarzda o‘tdi. Odatda derbilar mana shunday o‘tishi kerak va shunday bo‘ldi ham. Har ikkala jamoa hujumkor taktikada o‘ynadi. Bu esa golli vaziyatlar ko‘p bo‘lishiga turtki bo‘ldi. Minglab muxlislar qarshisida ikkala jamoa ham juda yaxshi saviyada o‘yin ko‘rsatdi, deb o‘ylayman. Uchrashuv biz kutgan ssenariy ostida o‘tdi. Garchi birinchi bo‘lib ol o‘tkazib yuborgan bo‘lsak-da, o‘zimizda kuch topa oldik va kuchli iroda evaziga g‘alabaga erishdik. Bor kuchlari bilan o‘ynaganliklari uchun shogirdlarimga alohida rahmat aytaman. Shuningdek, omad ham bizga kulib boqqanini aytgan bo‘lardim, - deydi “Lokomotiv” ustozi Andrey Vitalyevich.

- Odatda raqiblarimiz bizga qarshi himoyaviy taktikada o‘ynashardi. Biroq “Bunyodkor” ochiq va hujumkor futbol taklif qildi. Bu esa bahsni yanada qizg‘in tus olishini ta’minladi. O‘yinning borishi va saviyasi shaxsan menga yoqdi. Bu kabi o‘yinlar ko‘paysa foydali bo‘lar edi, - deydi “Lokomotiv” tarkibida uchrashuvning eng yaxshi futbolchisi, deb topilgan Marat Bikmayev.