“Бунёдкор” – “Локомотив” учрашувидан кейинги матбуот анжуманининг биринчи қисмида “темирйўлчилар” вакиллари иштирок этишди.

- Учрашуви қизиқарли кечди. Аниқроқ айтадиган бўлсам, ўйин ўз мақомига мос тарзда ўтди. Одатда дербилар мана шундай ўтиши керак ва шундай бўлди ҳам. Ҳар иккала жамоа ҳужумкор тактикада ўйнади. Бу эса голли вазиятлар кўп бўлишига туртки бўлди. Минглаб мухлислар қаршисида иккала жамоа ҳам жуда яхши савияда ўйин кўрсатди, деб ўйлайман. Учрашув биз кутган сценарий остида ўтди. Гарчи биринчи бўлиб ол ўтказиб юборган бўлсак-да, ўзимизда куч топа олдик ва кучли ирода эвазига ғалабага эришдик. Бор кучлари билан ўйнаганликлари учун шогирдларимга алоҳида раҳмат айтаман. Шунингдек, омад ҳам бизга кулиб боққанини айтган бўлардим, - дейди “Локомотив” устози Андрей Витальевич.

- Одатда рақибларимиз бизга қарши ҳимоявий тактикада ўйнашарди. Бироқ “Бунёдкор” очиқ ва ҳужумкор футбол таклиф қилди. Бу эса баҳсни янада қизғин тус олишини таъминлади. Ўйиннинг бориши ва савияси шахсан менга ёқди. Бу каби ўйинлар кўпайса фойдали бўлар эди, - дейди “Локомотив” таркибида учрашувнинг энг яхши футболчиси, деб топилган Марат Бикмаев.