Braziliyaning «Shapekoense» klubi futbolchilari o‘tirgan samolyotning halokatiga yoqilg‘i yetishmasligi sabab bo‘lgan, deb xabar bermoqda AFP.
2016 yil 29 noyabr kuni «Shapekoense» klubi futbolchilari o‘tirgan samolyot Kolumbiyada halokatga uchragan edi. Natijada, 71 nafar inson, shu jumladan jamoaning 19 nafar futbolchisi hayotdan ko‘z yumdi. 6 nafar inson tirik qoldi, shu jumladan, «Shapekoense»ning uch nafar futbolchisi - Alan Rushel, Jekson Folman va Xelio Sampyer Neto, jurnalist Rafael Enzel va ekipajning ikki a’zosi.
«Reysni amalga oshirgan aviakompaniya fors-major holatlarni yetarli darajada nazorat qilmagan. Natijada, yoqilg‘i yetishmay qolgani sababli samolyot halokatga uchragan» - dedi Braziliya tergov qo‘mitasi rahbari Migel Kamacho.
«Shapekoense» klubi Sudamerikana kubogi finalida Kolumbiyaning «Atletiko Nasyonal» klubi bilan bellashishi uchun uchib ketayotgan edi. Keyinchalik, kolumbiyaliklar taklifiga ko‘ra, KONMEBOL «Shapekoense»ni Sudamerikana kubogi g‘olibi deb e’lon qildi.
