Guliston shahrida O‘zbekiston Milliy olimpiya qo‘mitasi tashabbusi bilan tashkil etilgan «Olimpiya kelajagi» musobaqalarining «B» guruhida hududiy bosqich bellashuvlari yakunlandi.

Unda 1-o‘rinni Toshkent shahri vakillari qo‘lga kiritgan bo‘lsa, 2-o‘rin jizzaxlik taekvondo ustalariga nasib etdi. 3-o‘rinlarni Sirdaryo va Samarqand viloyatlari sportchilari egallashdi.

Eslatib o‘tamiz, 21-22 aprel kunlari Farg‘ona shahrida «A» guruhi bellashuvlari o‘tkazilib, unda mezbonlar respublika bosqichida ishtirok etish huquqini qo‘lga kiritgan edi.

Demak, sentyabr oyida bo‘lib o‘tadigan final bosqichda ishtirok etadigan ikki terma jamoa nomi ma’lum bo‘ldi. Ular Farg‘ona viloyati va Toshkent shahri jamoalaridir. Yana ikki terma jamoa nomi may oyida o‘tkaziladigan hududiy musobaqalardan so‘ng ma’lum bo‘ladi.