Matbuot anjumanining navbatdagi qismida mezbonlar ustozi Ro‘ziqul Berdiyev ishtirok etdi.

Ro‘ziqul Berdiyev: - Mag‘lubiyatga uchradik. Bunga sabab, jamoamizda ruhiy tushkunlik bor. Shuningdek bugungi o‘yinda jismonan tayyormasdek o‘ynadik. To‘g‘rirog‘i, oxirgi paytda vujudga kelgan muammolar tufayli, futbolchilarimizdagi ishtiyoqni oshirishga ham qiynalayapmiz. Bugun sust harakat qildik, go‘yoki futbolchilarimiz toliqib qolgandek. Ammo bari-bir ularga e’tiroz bildirmayman. Vaziyatni unglash uchun harakat qilishdi. Ta’kidlash joiz, “So‘g‘diyona” jamoasi bugun himoyada yaxshi o‘ynadi va qarshi hujumlardan foydalana oldi. Bizning bugungi o‘yinga tuzgan rejamiz shunday ediki, standart vaziyatlardan ko‘proq foydalanish va yetakchi o‘yinchilarimizning  tajribasidan foydalanish edi. Afsuski bu rejamiz amalga oshmadi.SHuni alohida ta’kidlashni istardim hozirgi muammolarimiz o‘z yo‘liga, ammo biz maydonga tushdikmi, g‘alaba uchun harakat qilishimiz kerak. Bizdan muxlislarimiz shuni kutishadi. 

Sanjar Rashidov bilan og‘zaki kelishuvga erishdik, u jamoamizni tark etadi. Afsuski, Rashidov jamoamiz o‘yiniga kirishib keta olmadi. Ko‘proq zaxirada qolib ketgani, uni ham bizni ham qoniqtirmaydi. Bu yoshdagi futbolchi o‘yini qovushadigan jamoada faoliyat yuritgani ma’qulroq.

Dragan Cheran “Lokomotiv” bilan bo‘lgan uchrashuvda qayta jarohat olgandi. U shu paytgacha davolanish bilan band bo‘ldi. Hozir mashg‘ulotlarni boshlagan, o‘ylaymanki, keyingi o‘yinlarda u bizga yordam bera oladi.