Bugun muhtasham «Bunyodkor» stadionida mamlakatimizning ikki yetakchi klubi «Nasaf» hamda «Bunyodkor» jamoalari o‘zaro kuch sinashadi. Uchrashuv soat 18:00da boshlanadi.
PEPSI Superliga, 10-tur
«BUNYODKOR» – «NASAF»
04.05.2018. «Bunyodkor» arena, soat 18:00da
Bosh hakam: Ravshan Ermatov (Toshkent)
Qanot hakamlari: Abduhamidullo Rasulov (Toshkent), Jahongir Saidov (Toshkent)
Zaxira hakami: Dmitriy Klepikov (Toshkent).
Nazoratchi – Marat Ismoilov (Toshkent).
Komissar – Ma’mur Saidqosimov.
Bu jamoalarning o‘zaro uchrashuvlari tarixiga nazar tashlasak, bu ikki jamoa milliy chempionatimizda shu paytgacha 22 marta kuch sinashgan. O‘tkazilgan o‘yinlarning 11 tasida «Bunyodkor»ning qo‘li baland kelgan bo‘lsa, 8 uchrashuvda kuchlar teng kelgan. «Nasaf» futbolchilari 3 o‘yinda g‘alaba nashidasini surishgan. To‘plar farqi – 30:12 «qaldirg‘ochlar» foydasiga.
Toshkentda bo‘lib o‘tgan o‘zaro 11 uchrashuvning faqat 1tasida «ajdarlar» g‘alabaga erishishgan. «Bunyodkor» esa Toshkentda 8 marta g‘alaba qozongan. Qolgan 2 uchrashuvda g‘olib aniqlanmagan.
«Nasaf» so‘nggi bor «Bunyodkor»ni Toshkentda 2014 yili mag‘lub etgan.
Ushbu jamoalar o‘rtasidagi har qanday uchrashuv qiziqarli va murosasiz kurashlarga boy bo‘lgan. Bugun ham stadionga tashrif buyurgan futbol ishqibozlari ana shunday uchrashuvga guvoh bo‘lishlari mumkin.
«Bunyodkor» jamoasi bu yilgi chempionatning o‘z maydonida o‘tkazgan 3 uchrashuvda g‘alaba qozongan. «Nasaf» shu paytgacha safardagi uchrashuvlarining faqat bittasida g‘alabaga erishgan. Jamoa safardagi uchrashuvlarni mag‘lubiyatsiz davom ettirmoqda.
«Bunyodkor» so‘nggi bor 6-turdagi o‘z maydonida bo‘lgan «Metallurg»ga qarshi uchrashuvda g‘alabaga erishgan. Keyingi uchta turda ketma-ket mag‘lubiyatga uchradi.
«Ajdarlar» bugun joriy chempionatdagi 6-safar uchrashuvini o‘tkazadi. «Bunyodkor» esa, 6-uy uchrashuvida maydonga tushadi.
Quyida futbol ishqibozlari uchun qo‘shimcha qiziqarli ma’lumotlarni taqdim etamiz.
Uchrashuvning tanaffus vaqtida, muxlislar uchun o‘zbek estradasi yulduzlari ijrosidagi konsert dasturi taqdim etiladi. Bu gal go‘zal va latofatli Rayxon G‘aniyeva sizlarning xizmatingizda bo‘ladi.
Bundan tashqari stadionga kelgan tomoshabinlardan ikki nafari uylariga iPhone8 smartfoni bilan qaytishga muvaffaq bo‘ladilar. O‘zbekiston futbol assosiasiyasi hamda O‘zbekiston Professional futbol ligasi tomonidan ta’sis etilgan sovg‘alar sifatida muxlislar uchun lotereyada aynan shu 2ta iPhone8 smartfoni o‘ynaladi.
Shunday ekan imkoniyatni qo‘ldan boy bermang, stadionga keling.
