Xabaringiz bor, aprel oyining boshida Milliy olimpiya qo‘mitasi Prezidenti, O‘zbekiston futbol Assosiasiyasining birinchi vise-prezidenti Umid Ahmadjonovning jahonga mashhur “Pepsi” kompaniyasi vakillari bilan muloqoti chog‘ida kompaniyaning O‘zbekistondagi vakolatxonasi rahbarlari mamlakat futbolida yuz berayotgan islohotlarni yuqori baholagan va O‘zbekiston futbol Assosiasiyasining yangi tashkil etilgan Superligasiga homiylik qilish taklifi bilan chiqqandi.

Kopmaniya mutasaddilari “Pepsi” kompaniyasi reklama industriyasida aynan sportning futbol turiga katta e’tibor qaratishini, jumladan, jahoning eng nufuzli sport musobaqalaridan biri – futbol bo‘yicha Yevropa chempionlar ligasining ham rasmiy homiysi hisoblanishini ta’kidlashar ekan, o‘zbek futbolida ro‘y berayotgan ijobiy o‘zgarishlar, islohotlarda ham bevosita ishtirok etishni, shu orqali o‘zbek sporti taraqqiyoti va rivojlanishiga hissa qo‘shishni, qolaversa, O‘zbekiston Superligasi kompaniyani yanada mashhurroq qilish, mahsulotlarini reklama qilish uchun katta bozor ekanligini, bu imkoniyatni qo‘ldan chiqarmasligi lozimligini ta’kidlashgandi.

Shu tariqa ikki tashkilot o‘rtasida shartnoma imzolandi. Bu bilan o‘zbek futboli tarixida birinchi marta O‘zbekiston Superligasi o‘zining titul homiysiga ega bo‘ldi.

Shartnomaga ko‘ra, Professional futbol ligasi kompaniyaning “Pepsi” reklamasi uchun sharoit yaratib berishi ko‘rsatilgan. Bu ishlar PFL va klublar tomonidan amalga oshirilmoqda. Mamlakatimizda sport taraqqiyoti va Olimpiya harakatini yangi bosqichga olib chiqish, sportda marketing sohasini yanada rivojlantirish maqsadida amalga oshirilayotgan mazkur tashabbusda barcha Ommaviy axborot vositalari xodimlarining ham ishtirok etishga chaqirib qolamiz. Buning uchun O‘zbekiston Professional futboli – Superliga haqida yoziladigan har qanday xabar yo maqolada albatta “Pepsi” so‘zini qo‘shib yozishni, Superligani esa “Pepsi Superliga” ko‘rinishida bayon etishni so‘rab qolamiz.