Ertaga futbol bo‘yicha mamlakat milliy chempionati – Pepsi Superliga sining 11-tur uchrashuvlariga start beriladi. Bekoboddagi “Metallurg” stadionida Toshkent viloyati jamoalari derbisi "Metallurg" – AGMK uchrashuvi bo‘lib o‘tadi.
Bugun mazkur uchrashuv oldidan miting bo‘lib o‘tdi. Unda uchrashuvni yuqori saviyada o‘tkazish borasida qilinishi lozim bo‘lgan tashkiliy masalalar o‘yin komissari hamda klublar vakillari tomonidan muhokama etib o‘tildi. O‘z navbatida jamoalarning bu o‘yinda qanday liboslarda maydonga chiqishiga oydinlik kiritildi. "Metallurg" ertangi bellashuvda ko‘k rangli libosda maydonga tushishi ma’lum bo‘ldi. AGMK futbolchilari esa sariq rangli liboslaridan foydalanishadi.
Eslatib o‘tamiz, "Metallurg" va AGMK jamoalari o‘rtasidagi uchrashuv 10 may, payshanba kuni, soat 20:30da "Metallurg" stadionida boshlanadi. Uchrashuvdan oldin, aniqrog‘i 18:00 dan estradamiz yulduzlari – UMMON hamda VIA Maroqand guruhlarining chiqishlari muxlislar e’tiboriga havola etiladi. “Metallurg” stadioniga oshiqing!
