Bugun Qarshidagi “Markaziy” stadionda katta futbol. Mamlakatimizning ikki grand jamoasi o‘zaro bahs yuritadi. Pepsi Superliganing 11-turining markaziy uchrashuvida “Nasaf” hamda “Paxtakor” jamoalari o‘zaro bellashadi. Uchrashuv soat 18:30da boshlanadi.
Mazkur uchrashuvda Ravshan Ermatov boshchiligidagi Superliga tarixida ilk marta 5 nafar hakamdan iborat guruh ish olib boradi.
Pepsi Superliga, 11-tur
"Nasaf" (Qarshi) - "Paxtakor" (Toshkent)
11.05.2018. “Markaziy” stadion, 18:30da
Bosh hakam: Ravshan Ermatov
Qanot hakamlari: Abduhamidullo Rasulov, Jahongir Saidov
Darvoza chizig‘idagi hakamlar: Valentin Kovalenko, Axrol Risqullayev
Zaxira hakami: Asker Najafaliyev
Nazoratchi: Rashid Aytekov
Uchrashuv komissari: Ma’mur Saidqosimov.
Bugun futbol o‘yinidan tashqari muxlislarni bir-biridan qiziqarli tadbirlar ham kutib turibdi. Bahsdan oldin hamda tanaffus vaqtida, muxlislar uchun qarshilik estrada xonandasi Xurshid Rustamov ijrosidagi konsert dasturi taqdim etiladi.
Uchrashuvga tashrif buyurgan muxlislarning to‘rt nafari, lotereya o‘yini orqali MDC smartfonlarini hamda 4 nafari sport kiyimlarini yutib olib, xo‘sh kayfiyat bilan uylariga qaytishlari mumkin.
Endi albatta, bugun qiziqarli futbol uchrashuvi bo‘ladi. Berdiyev va Arveladze tuqnashuvida kimning qo‘li baland keladi? To‘rt uchrashuvdan buyon g‘alaba qozona olmayotgan “Nasaf” g‘olib bo‘ladimi? Yoki o‘tgan ikki uchrashuvda ketma-ket ochko yo‘qotgan, 2016 yildan buyon Qarshidan bosh egib qaytayotgan “Paxtakor” ustun keladimi? Bu savollarga o‘yindan keyin javob topamiz.
Quyida mazkur jamoalarning o‘zaro uchrashuvlarida qayd etgan natijalarini eslatib o‘tamiz.
.jpg)
Qarshidagi o‘tkazilgan uchrashuvlarda ozgina bo‘lsada, “ajdarlar” ustunlik qilishmoqda. Bungacha bo‘lgan 21 uchrashuvning 8 tasida “Nasaf”, 6 tasida “Paxtakor” g‘alabaga erishgan, qolgan 7 uchrashuvda murosa ko‘chasi tanlangan.
“Markaziy” stadionda bugun futbol ishqibozlarining har qachongidan faol bo‘lishi kutilmoqda. Vohalik va Toshkentlik futbol ishqibozlaridan tashqari, bahsni bevosita stadionda tomosha qilish uchun Surxondaryo, Buxoro, Navoiy va Samarqand viloyatlaridan ham muxlislar kelishmoqda.
