Matbuot anjumanining navbatdagi qismida “Nasaf” jamoasi bosh murabbiyi Ro‘ziqul Berdiyev ishtirok etdi va o‘yin haqida quyidagi fikrlarni bildirdi.

Ro‘ziqul Beridiyev: - Bugungi uchrashuvda 70 daqiqa “Paxtakor”ga qarshilik ko‘rsata oldik. Oxirgi 20 daqiqada o‘yinni ko‘ngildagidek olib borishga jamoamizda kuch qolmadi. O‘zlaringiz guvoh bo‘ldilaringiz, “Paxtakor” jamoasi bugun bizga nisbatan ko‘proq vaziyatlar yarata oldi. Bugungi uchrashuvdagi maqsadimiz, “Paxtakor” jamoasi jarima maydonchasi oldida ko‘proq bosim o‘tkazishimiz kerak edi. Afsuski, himoyadagi qo‘pol xatolarimiz, raqibimizga qo‘l keldi. Mana shular bugungi mag‘lubiyatimizga asosiy sabab bo‘ldi. 

Moliyaviy holatimiz? Afsuski, moliyaviy holatimizda hech qanday ijobiy o‘zgarish bo‘lgani yo‘q. Biz bu vaziyatni yaxshilanishini kutayapmiz. Ammo bu hal bo‘lmayapti. Bu albatta futbolchilarimizga ruhiy tomondan salbiy ta’sir qilishi aniq. Lekin futbolchilarimiz bilan birgalikda vaziyatni o‘nglashga harakat qilayapmiz. Hozir jamoamizning umumiy jismoniy holati ham yaxshi emas. Futbolchilarimizdan kimnidir tanqid qilishdan yiroqman. Ularning kuchi bugun 70 daqiqaga yetdi. Balki, biz qaysidir o‘yinchilar bilan xayralishishimizga to‘g‘ri kelar. Ko‘rinib turibdiki, bu ketishda ahvolni yaxshilab bo‘lmaydi. Qiyin vaziyat. Biz bu vaziyatdan chiqib ketish yo‘lini axtarishimiz kerak. Bu yilgi chempionatda hamma o‘yinlar biz uchun qiyin o‘tayapti. G‘alaba qozongan uchrashuvlarimiz ham biz uchun oson bo‘layotgani yo‘q.