"Tottenxem" klubi yarim himoyachisi Dele Alli boohooMAN kompaniyasi bilan hamkorlikda o‘zining kiyim-kechak liniyasiga asos soldi.

10 may kuni Londondagi Radio Rooftop klubida APLning eng zamonaviy yarim himoyachilaridan biri bo‘lgan Dele Allining kiyim-kechak liniyasi namoyishi bo‘lib o‘tdi. Mazkur ochilish marosimida futbolchining qiz o‘rtog‘i hisoblangan Rubi Mey, taniqli bokschi Entoni Joshua, klubdoshlari Kayl Uoker-Piters, Kiran Tripper, Mussa Dembele, Mishel Vorm, Xarri Uinks, Ben Devis va Yan Vertengon ishtirok etdilar.

Mazkur kolleksiya boohooMAN kompaniyasi bilan hamkorlikda o‘z faoliyatini boshladi. U 74 xil kiyim-kechakni o‘z ichiga qamrab olishiga qaramay, kolleksiyaning maxsus saytida ular sonining ancha oz qismi omma e’tiboriga havola etildi.

"Meni moda sohasi har doim o‘ziga jalb qilib kelgan, shuning uchun ham kiyimlar dizaynini yaratishda ishtirok etish men uchun maroqli. Insonlar kolleksiyani tomosha qilishini intizorlik bilan kutmoqdaman", – deydi Alli prezentasiyada avvalida.

Kolleksiya o‘ziga xos va turli xil bo‘lib, uning tarkibida oyoq kiyimidan tashqari erkaklar garderobi uchun zarur bo‘lgan barcha kiyim turlarini topishimiz mumkin. Shu bilan birgalikda, narxlarning 12 funtdan 45 funtgacha ekani bilan ham haridorgir hisoblanadi. Bomber va nimchalarning narxi taxminan 40 funt etib belgilangan.

Shuningdek, kolleksiya tarkibida 35 funtdan 40 funtgacha bo‘lgan jinsi kurtkalarni ham uchratishimiz mumkin. Qaysi modelga mansubligiga ko‘ra taxminan 30 funt turuvchi jinsi nimcha va shimlar stil jihatidan insonlarga ancha manzur keladi.

Shu bilan birgalikda, bir qo‘li qizil va qolgan qismi oq qora bo‘lgan ko‘ylaklar ham kiyim-kechaklar orasida xaridorlarning e’tiborini jalb qilishi turgan gap.

Futbolchining mazkur kolleksiyasi bilan boohooMAN sayti orqali ham tanishishingiz mumkin.