Butun mavsum davomida Ispaniya chempionatini mag‘lubiyatsiz o‘tkazib kelayotgan "Barselona", kutilmaganda, mag‘lubiyat alamini tortishga majbur bo‘ldi.

Valverde "Levante" qarshi safar bahsi uchun asosiy tarkibning ba’zi futbolchilari, jumladan, Messi, Umtiti va Pikega dam berishga qaror qildi. Shu sabab bo‘lsa kerak, "ko‘k-anorranglilar"ning himoya chizig‘i juda va juda sust o‘yin ko‘rsatishdi. Mezbonlar tanaffusga qadar raqib darvozasini 2 marta ishg‘ol qilgan bo‘lsalar, kataloniyaliklar Koutinyoning zarbasi orqali bir marta javob qaytarishdi.

Ikkinchi bo‘lim "Barsa" uchun o‘ta qo‘rqinchli boshlandi. "Levante" futbolchilari dastlabki 10 daqiqa ichida tezkor qarshi hujumlar tashkil qilib, naq 3ta gol urishga muvaffaq bo‘lishdi. Hisob 5:1ga yetdi. Emmanuel Boateng "xet-trik"ni rasmiylashtirdi.

Shundan so‘ng "Barselona" "kambek" qilish uchun harakatlarni boshlab yubordi. Filippe Koutinyo ikki marta aniq zarba bilan "xet-trik"ga erishgan bo‘lsa, Luis Suares penaltidan samarali foydalanib, hisobni 5:4ga yetkazdi.

Bu paytga kelib o‘yin tugashiga hali 20 daqiqa bor edi. Valverde shogirdlari mag‘lubiyatdan qutulib qoladigandek ko‘rinishayotgandi, ammo ular shundan so‘ng biroz bo‘shashishdi, mezbonlar esa himoyada bexato o‘ynay boshlashdi. Oqibatda, o‘yinda hisob boshqa o‘zgarmadi — 5:4, "Barselona" La liganing ushbu mavsumida dastlabki mag‘lubiyatni o‘z hisobiga yozishga majbur bo‘ldi.

Ispaniya La ligasi, 37-tur
Levante – Barselona 5:4 (2:1, 3:3)
Gollar: 1:0 – 9 Boateng, 2:0 – 30 Boateng, 2:1 – 38 Koutinyo, 3:1 – 46 Bardi, 4:1 – 49 Boateng, 5:1 – 56 Bardi, 5:2 – 59 Koutinyo, 5:3 – 64 Koutinyo, 5:4 – 71, penalti Suares.
Levante – Olasabal, Rober, Luna, Koke, Postigo, Morales (Rochina, 85), Lukich, Kampanya, Bardi, Marti (Lerma, 69), Boateng (Passini, 77).
Barselona – ter Stegen, Mina, Alba, Nelson Semedu, Vermalen (Pike, 31), Buskets, Rakitich, Inyesta (Denis Suares, 60), Koutinyo, Dembele (Pako Alkaser, 60), Suares.
Ogohlantirishlar: Vermalen (20), Bardi (22), Boateng (37), Koke (62), Buskets (65), Kampanya (70), Suares (88), Lerma (88), Denis Suares (89), Passini (90), Pike (90), Mina (90).