Ayni paytda Namangan viloyatida Rossiyaning Chelyabinsk viloyati gubernatori Boris Dubrovskiy boshchiligidagi delegasiya mehmon bo‘lib turibdi.

Mazkur delegasiya a’zolaridan 2 nafari – Chelyabinsk viloyati jismoniy tarbiya va sport vaziri Lev Oder hamda uning o‘rinbosari Yevgeniy Shestakov bugun “Navbahor” jamoasi o‘z uy uchrashuvlarini o‘tkazadigan Namangan shahridagi “Markaziy” o‘yingohga tashrif buyurishdi. Ularga Namangan viloyat Jismoniy tarbiya va sportni rivojlantirish jamg‘armasi direktori Akmal Mamadumarov hamrohlik qildi.

Martabali mehmonlarni “Navbahor” PFK direktori Baxtiyor Boboyev, “Navbahor” PFK direktor o‘rinbosari Ilhomjon Mirzaboyev, shuningdek, klub hamda stadion xodimlari, bundan tashqari, “Navbahor - Umid” futbol akademiyasi futbolchilari tantanali tarzda kutib olishdi.

Mehmonlar “Markaziy” o‘yingoh maydoni, futbolchilarning kiyim almashtirish xonasi va chigalyozdi mashqlarini bajaradigan zal, hakamlar hamda nazoratchi hakam xonalari,klub foyesini ko‘zdan kechirishdi. Martabali mehmonlar foyedagi "Navbahor" PFK pannosi oldida esdalik uchun suratga tushishdi. Lev Oder va Yevgeniy Shestakovga klub mehmonxonasida Pepsi Superliga 3-doirasidagi “Navbahor” – “Lokomotiv” (2:0) jamoalari o‘rtasidagi uchrashuvning videoroligi namoyish etildi.

Tashrif yakunida Chelyabinsk viloyatidan tashrif buyurgan mehmonlarga “Navbahor” PFKning maxsus sovg‘alari – klub logotipi tushirilgan futbolka, sharf va kepkalar topshirildi.

Martabali mehmonlar mazkur tashrifdan xursandliklarini izhor etishdi.

“Navbahor” PFK matbuot xizmati.