Angliya kubogining hal qiluvchi bahsi bo‘lib o‘tdi. Londondagi «Uembli» o‘yingohida «Chelsi» va «Manchester Yunayted» klublari to‘qnash kelishdi.

Mazkur o‘yin har ikkala jamoa uchun mavsumni sovrin bilan yakunlash uchun so‘nggi imkoniyat edi. Boisi, yutqazgan jamoa ushbu mavsumni birorta sovrinsiz yakunlashga majbur bo‘lardi. Bugungi uchrashuvda birinchi bo‘lib gol urgan jamoa taktik jihatdan ustunlikka ega bo‘lib olardi. Bu imkoniyatdan Konte shogirdlari foydalanishdi.

Birinchi bo‘limning o‘rtalarida Eden Azar tezlik evaziga "MYU" futbolchisi Fil Jonsdan o‘tib ketdi, himoyachi jarima maydonchasi ichida raqibini yiqitishga majbur bo‘ldi. Belgiyalik futbolchining o‘zi belgilangan penaltidan samarali foydalanib, hisobni ochdi.

Qolgan daqiqalarda "Chelsi" hisobni ushlashga harakat qildi. "MYU" yaratgan imkoniyatlardan foydalana olmadi. Tibo Kurtua ham o‘yinni yuqori saviyada o‘tkazdi.

Shu tariqa, "Chelsi" o‘z tarixida 8-marta Angliya kubogini qo‘lga kiritdi. Joze Mourinyo esa ushbu mavsumni sovrinsiz yakunladi.

Angliya kubogi, final
19 may, 21.15, «Uembli»
CHELSI – MANCHESTER YUNAYTED 1:0 (1:0, 0:0)
Gol: 1:0 – 22, penalti Azar.
Chelsi – Kurtua, Aspilikueta, Keyxill, Ryudiger, Mozes, Azar (Villian, 90), Fabregas, Kante, Bakayoko, Alonso, Jiru (Morata, 89).
Manchester Yunayted – De Xea, Jons (Mata, 87), Smolling, Valensiya, Yang, Pogba, Matich, Lingard (Marsyal, 73), Errera, Sanches, Reshford (Lukaku, 73).
Ogohlantirishlar: Jons (21), Valensiya (58), Kurtua (90).