Англия кубогининг ҳал қилувчи баҳси бўлиб ўтди. Лондондаги «Уэмбли» ўйингоҳида «Челси» ва «Манчестер Юнайтед» клублари тўқнаш келишди.

Мазкур ўйин ҳар иккала жамоа учун мавсумни соврин билан якунлаш учун сўнгги имконият эди. Боиси, ютқазган жамоа ушбу мавсумни бирорта совринсиз якунлашга мажбур бўларди. Бугунги учрашувда биринчи бўлиб гол урган жамоа тактик жиҳатдан устунликка эга бўлиб оларди. Бу имкониятдан Конте шогирдлари фойдаланишди.

Биринчи бўлимнинг ўрталарида Эден Азар тезлик эвазига "МЮ" футболчиси Фил Жонсдан ўтиб кетди, ҳимоячи жарима майдончаси ичида рақибини йиқитишга мажбур бўлди. Бельгиялик футболчининг ўзи белгиланган пенальтидан самарали фойдаланиб, ҳисобни очди.

Қолган дақиқаларда "Челси" ҳисобни ушлашга ҳаракат қилди. "МЮ" яратган имкониятлардан фойдалана олмади. Тибо Куртуа ҳам ўйинни юқори савияда ўтказди.

Шу тариқа, "Челси" ўз тарихида 8-марта Англия кубогини қўлга киритди. Жозе Моуриньо эса ушбу мавсумни совринсиз якунлади.

Англия кубоги, финал
19 май, 21.15, «Уэмбли»
ЧЕЛСИ – МАНЧЕСТЕР ЮНАЙТЕД 1:0 (1:0, 0:0)
Гол: 1:0 – 22, пенальти Азар.
Челси – Куртуа, Аспиликуэта, Кэйхилл, Рюдигер, Мозес, Азар (Виллиан, 90), Фабрегас, Канте, Бакайоко, Алонсо, Жиру (Мората, 89).
Манчестер Юнайтед – Де Хеа, Жонс (Мата, 87), Смоллинг, Валенсия, Янг, Погба, Матич, Лингард (Марсьяль, 73), Эррера, Санчес, Рэшфорд (Лукаку, 73).
Огоҳлантиришлар: Жонс (21), Валенсия (58), Куртуа (90).