"Manchester Yunayted" bosh murabbiyi Joze Mourinyo Angliya kubogi final bahsidan keyin o‘z fikrlarini bildirib o‘tdi.
"O‘ylashimcha, "Chelsi" Angliya kubogida g‘olib chiqishga munosib emas edi, lekin men ularni tabriklayman. Men "Manchester Yunayted" saviyasiga mos murabbiy bo‘lishim kerak va o‘zimni shunga monand tutishim lozim. Shunga qaramay, biz bugun g‘alabaga loyiq edik.
Hozir televideniyeda nimalar gapirishayotgani, matbuotda nimalar yozilayotgani men uchun qiziq. Agar biz "Chelsi"ga o‘xshab o‘ynaganimizda, nimalar yozilishini tasavvur qila olaman.
Bugun bizga Lukaku yetishmadi. To‘qqiz kishi bo‘lib o‘ynaydigan jamoaga qarshi o‘ynash og‘ir. Hujumda bizga kuchli forvard yetishmadi.
Har bir mag‘lubiyatni qabul qilish qiyin, ammo uyga shunday hissiyot bilan qaytamizki, biz maydonda borimizni berdik. Hech narsadan afsuslanmayman.
"Chelsi" to‘g‘ri chiziq bo‘yicha o‘ynadi. Biz esa turli o‘yin variantlarini sinab ko‘rdik , lekin "Chelsi" mudofaasi juda zich o‘ynadi", – dedi Mourinyo.