Xabar berib o‘tganimizdek, may oyidan boshlab O‘zbekiston Milliy Olimpiya qo‘mitasi hamda Maktabgacha ta’lim vazirligi tomonidan maktabgacha ta’lim muassasalari tarbiyalanuvchilar o‘rtasida “Kichkintoylar-shirintoylar” ommaviy sport musobaqalari tashkil etilmoqda.
Bugun, 24 may kuni Toshkent shahar sport o‘yinlari va yengil atletikaga ixtisoslashtirilgan bolalar-o‘smirlar sport maktabida ushbu musobaqalarning Toshkent shahar bosqichi o‘tkazildi.
Bungacha, Toshkent shahrining barcha tumanlarida “Kichkintoylar-shirintoylar” ommaviy sport musobaqalarining saralash bosqichlari o‘tkazilib, eng kuchli jamoalar shahar bosqichida tuman sharafini himoya qilish huquqini qo‘lga kiritgandilar. Jamoa tarkibida 5 nafar o‘g‘il va 5 nafar qiz bolalar bellashuvlarda ishtirok etishdi.
Musobaqa tasdiqlangan dastur asosida 4 ta yo‘nalishda o‘tkazildi. Bellashuvlar yakuniga ko‘ra, Yunusobod tumani jamoasi birinchi o‘rinni qo‘lga kiritdi. Ikkinchi va uchinchi o‘rinlar mos ravishda Mirzo Ulug‘bek va Uchtepa tumani jamoalariga nasib qildi. G‘olib va sovrindor jamoalariga O‘zbekiston Milliy Olimpiya qo‘mitasi tomonidan futbolka, diplom va esdalik sovg‘alari topshirildi.
Iyun-avgust oylarida Respublikamizning qolgan viloyatlarida ham mazkur yo‘nalishdagi musobaqalarning hududiy bellashuvlari ham tashkil qilinadi.