Bugun Milliy olimpiya qo‘mitasida Respublikamizda faoliyat olib borayotgan Olimpiya zaxiralari kollejlari va sport federasiyalar rahbarlari bilan qo‘shma yig‘ilish tashkil qilindi. Unda O‘zbekiston Milliy olimpiya qo‘mitasi Prezidenti Umid Ahmadjonov va Bosh kotib Jasur Matchanov ham ishtirok etdi.
Yig‘ilishda Respublikamizdagi Olimpiya zaxiralari kollejlari faoliyatini takomillashtirish, u yerdagi tizimni to‘g‘ri yo‘lga qo‘yib olish va boshqa tashkiliy masalalar muhokama qilindi. Bundan buyon har bir Olimpiya zaxiralari sport kollejlarida fitness markazlari tashkil qilinishi ma’lum qilindi.
«Olimpiya zaxiralari kollejlari terma jamoalarimiz uchun asosiy baza sifatida xizmat qilishi kerak. Yaratilayotgan imkoniyatlardan samarali foydalanishimiz lozim. Ana shundagina ko‘zlagan maqsadimizga erishamiz. Kollejlar va sport federasiyalari yaqin hamkorlikda ishlashlari shart. Har bir federasiya rahbari o‘z sport turi bo‘yicha Olimpiya zaxiralari kollejlarida tahsil olayotgan yosh sportchilar xaqida ma’lumotga ega bo‘lishi kerak. Kollejlar faoliyatini aynan federasiyalar monitoring qilsa maqsadga muvofiq bo‘ladi. Kollejlardagi tizimni yo‘lga qo‘yib olganimizdan so‘ng navbat bolalar va o‘smirlar sport maktablariga keladi», – dedi MOQ rahbari Umid Ahmadjonov.
Uchrashuvda so‘zga chiqqanlar mazkur o‘quv dargohi faoliyatidagi kamchiliklar, muammolar, tizimni to‘g‘ri yo‘lga qo‘yib olish borasidagi takliflarini bildirdilar.
