Bugundan PEPSI Superligasida 15-tur uchrashuvlari start oladi. Kun doirasidan faqat bitta o‘yin o‘rin olgan bo‘lib, unda Farg‘ona vodiysining ikki jamoasi – “Navbahor” va “Qo‘qon-1912” o‘zaro bahs yuritadi. 

Mazkur uchrashuv soat 19:02da boshlanadi. Uni Aziz Asimov boshchiligidagi hakamlar guruhi boshqarib boradi. 

15-tur / 10 iyun (yakshanba)

“NAVBAHOR” – “QO‘QON-1912”

Hakamlar: A. Asimov, R. Shoyaxmetov, A. Kalinin, D. Karimov.

Nazoratchi – N. Lutfullin.

Komissar – L. Qo‘chqorov.

Ta’kidlash joizki, “Navbahor” hamda “Qo‘qon-1912” jamoalarining o‘zaro uchrashuvlari hamisha qiziqarli tarzda o‘tib kelgan. “Vodiy derbisi” maqomi ostida kechadigan o‘yinlarda har ikki klub vakillari ham raqibga bo‘sh kelmaslikka urinishadi. 

Hozirga qadar “Navbahor” O‘zbekiston milliy chempionatlari doirasida “Qo‘qon-1912”ga qarshi 25ta uchrashuv o‘tkazgan. O‘zaro o‘yinlarning 15tasida namanganliklar g‘alaba qozonishgan. 6ta bahs esa “Qo‘qon-1912” foydasiga hal bo‘lgan. Yana 4ta uchrashuv durang bilan nihoyasiga yetgan. “Navbahor” futbolchilari ushbu raqib darvozasiga 50ta to‘p kiritishga muvaffaq bo‘lishgan. Qo‘qonliklar esa “Navbahor” darvozasiga 28 marta yo‘l topa olishgan. 

Jamoalarning birinchi davradagi o‘yini qo‘qonlik futbolchilar foydasiga hal bo‘lgan edi – 1:0. 

 Ayni paytda “Navbahor” jamoasi 13ta uchrashuvdan so‘ng 24 ochko jamg‘arib, musobaqa jadvalida 3-pog‘onada bormoqda. “Qo‘qon-1912” esa 15 ochko bilan 8-o‘rinni band etgan.