La liga prezidenti Xavyer Tebas Ispaniya superbogini bitta o‘yindan iborat qilish g‘oyasini qo‘llab-quvvatlashini aytib o‘tdi.

"Superkubok bitta o‘yindan iborat bo‘lishini qo‘llab-quvvatlayman, ammo bu ko‘p muammolar bilan bog‘liq", — dedi Tebas.

Ushbu g‘oya Ispaniya superkubogi doirasida "Barselona" - "Sevilya" to‘qnashuvini o‘tkazish borasida muammolar yuzaga kelayotgani bois yuzaga kelgandi. La liga o‘yinlarni 5 va 12 avgust kunlari o‘tkazishni taklif qilayotgan bo‘lsa, "ko‘k-anorranglilar" uchrashuvlarni bir haftaga keyinga ko‘chirishni so‘rashgandi. Boisi, kataloniyaliklar 5 avgust kuni "Milan"ga qarshi nazorat o‘yinida maydonga tushishni rejalashtirib qo‘yishgandi. Ammo La liga rahbariyati "Barsa"ning taklifiga rad javobini berishdi. Shundan so‘ng Superkubokni faqat bitta o‘yin orqali aniqlash fikri yuzaga kelgandi.

«Barselona» esa Ispaniya superkubogining 2ta bahsdan iborat bo‘lishini istamoqda. Bu haqda jamoa matbuot xizmati xabar tarqatdi.

«Superkubok ikkita o‘yindan bo‘lishini istaymiz. Boisi, bu musobaqa an’anasi. O‘yinlardan biri "Kamp Nou"da bo‘lib o‘tadi va bu bizga qo‘shimcha daromad keltiradi» — dedi klub vakili.

Ispaniya qirollik futbol federasiyasi ushbu masalani 23 iyun kuni bo‘lib o‘tadigan yig‘ilishda ko‘rib chiqadi. Agar Superkubok faqat bitta o‘yindan iborat bo‘lishi haqida qaror qabul qilinsa, u katta ehtimol bilan "Vanda Metropolitano"da o‘tkaziladi.