Avval xabar berganimizdek, kecha, 11 iyun kuni o‘zbekistonlik bokschilar joylashgan samolyot O‘zbekistonga kelib qo‘ndi. Sportchilar Islom Karimov nomidagi “Toshkent” xalqaro aeroportida kutib olindi.
 
Aeroportda Ostonadagi musobaqada yagona oltin medalni qo‘lga kiritgan o‘zbekistonlik bokschi Bektemir Meliqo‘ziyev o‘z fikrlarini bildirib o‘tdi.
 
“Musobaqada kuchli raqiblarga qarshi to‘qnash keldik. U yerda tajriba orttirdik. Bu katta musobaqalarga tayyorgarlik yo‘lida yaxshigina tayyorgarlik vazifasini o‘tab berdi. Ostonada kutilgan va kutilmagan raqiblar bo‘ldi. Shunga qaramay, murabbiylarimiz ko‘rsatmalarini to‘g‘ri bajargan holda, munosib ishtirok eta oldik.
 
Ortda qolgan ikkita turnir Osiyo o‘yinlari oldidan muhim ahamiyatga ega edi. Umuman olganda, musobaqalar biz uchun yomon kechmadi. Hakamlar? Qozog‘istondagi musobaqa davomida hakamlik bo‘yicha biroz muammolar bo‘ldi. Shaxsan men uchun final jangi qiyin o‘tdi”, dedi Bektemir Meliqo‘ziyev.
 
Eslatib o‘tamiz, musobaqada Bektemir Meliqo‘ziyev oltin, Shunqor Abdurasulov va Iqboljon Xoldorov kumush, Shaxobiddin Zoirov, Aliyor Noraliyev, Mahmud G‘oipov va Isroil Madrimovlar bronza medali sohibiga aylandi.