Rossiyada jahon chempionati boshlanishiga tayyorgarlik ketayotgan vaqtda, Ispaniya poytaxti Madridda ko‘zi ojizlar o‘rtasida futbol bo‘yicha jahon chempionati eng qizg‘in pallasiga kirdi.

Sagrado Corazón kolleji maydonida o‘tayotgan musobaqada 16 ta davlat terma jamoasi ishtirok etmoqda. 

Ayni vaqtgacha ushbu sport turi bo‘yicha jahon chempionatlarini 4 marta Braziliya, 2 marta Argentina yutgan. Boshqa birorta davlat hali bu unvonni qo‘lga kirita olmagan.

Ispaniya ikkinchi bor ushbu musobaqani qabul qilmoqda, bu yerda birinchi marta jahon chempionati 2000 yilda Xeres-de-la-Fronterada bo‘lib o‘tgan. Umuman, Ispaniya bu sport turi vatani hisoblanadi. Ushbu sport turi bo‘yicha ilk jahon chempionati 1998 yilda bo‘lib o‘tgan. 2004 yilda ko‘zi ojizlar futboli Afinadagi Paralimpiya o‘yinlari dasturiga kiritilgandi.

Ko‘zi ojizlar futbolida o‘ziga xos qoidalar mavjud bo‘lib, futbolchilar 40 metrga 20 metrlik maydonda to‘p suradilar. Maydon atrofi to‘siqlar bilan o‘ralgan. O‘yin 20 daqiqalik 2 ta bo‘limdan iborat. Har bir jamoa 4 o‘yinchi va darvozabondan tashkil topgan.

 

Bundan tashqari, raqiblar darvozasi orqasida turib, o‘yinchilarga darvoza qayerdaligini aytib turuvchi yordamchilar bor. Futbolchilar maydonda ko‘zlarida qora bog‘ichlar bilan harakatlanishadi. To‘p yorqin rangda va odatdagidan og‘irroq bo‘ladi. Uning ichida harakatlanish vaqtida ovoz chiqaradigan shaqildoq bor. Tomoshabinlar o‘yinchilarga xalaqit qilmaslik uchun sukut saqlab o‘tirishlari talab etiladi.

Joriy chempionat finali esa 17 iyunda bo‘lib o‘tadi.