Bugun, 14 iyun kuni Rossiyada futbol bo‘yicha 21-jahon chempionati musobaqasiga start beriladi. Musobaqaning ochilish marosimi va o‘yini Moskva shahridagi “Lujniki” stadionida o‘tkaziladi.
 
Musobaqa ochilish marosimida O‘zbekiston Respublikasi Prezidenti Shavkat Mirziyoyev va yana 16 davlat rahbarlari ishtirok etishi ko‘zda tutilgan.
 
Ochilish o‘yinida esa JCH mezboni Rossiya Saudiya Arabiston terma jamoasi bilan bahs olib boradi. O‘yin Toshkent vaqti bilan soat 20:00 da boshlanadi.
 
Barcha terma jamoalar Rossiyaga yetib kelgan va o‘z qarorgohlarida muxlislarni ochiq mashg‘ulotlarni tomosha qilish uchun taklif etmoqdalar. Ispaniya terma jamoasidagi murabbiylar o‘zgarishi va Fransiya terma jamoasi hujumchisi Kilian Mbappening olgan jarohatidan tashqari, diqqatga sazovor voqealar sodir bo‘lgani yo‘q.
 
Barcha intizorlik bilan bugungi o‘yinni kutmoqda. Ayniqsa, rossiyaliklar o‘z terma jamoalarining bugungi natijasidan ancha avval xavotirga tusha boshlagan.
 
Xullas, bir oydan ko‘proq muddat bizni qiziqarli voqealarga boy bo‘lishi kutilayotgan jahon chempionati kutmoqda. Futbol bayramini o‘tkazib yubormang deymiz.
 
Ma’lumot o‘rnida, JCH-2018 final bosqichi 2018 yilning 14 iyunidan 15 iyuliga qadar Rossiyaning Moskva, Sankt-Peterburg, Qozon, Sochi, Nijniy Novgorod, Samara, Kaliningrad, Yekaterinburg, Saransk, Volgograd va Rostov na-Donu shaharlaridagi stadionlarda bo‘lib o‘tadi.