Pro-liga 15-turida «Xorazm» klubi Urganchda Haqqulobodning «Norin» klubini qabul qildi.
Birinchi bo‘lim mezbonlarning katta tashabbusi ostida o‘tdi. Hisob 29-daqiqada Temur Ismoilov tomonidan ochildi ochildi. Uning uzoq masofadan yo‘llagan zarbasidan so‘ng, to‘p darvoza to‘ridan joy oldi. Oradan 9 daqiqa o‘tgach, himoyachi Oybek Nurboyev jarima maydoniga yorib kirib, darvozabonni dog‘da qoldirdi.
«Norin» kamdan-kam hujumga o‘tsa-da, 1-bo‘lim oxirida hisobni qisqartirishga erishdi. Murtazoyev bir necha himoyachini aldab o‘tib, jarima maydoniga kirib bordi va aniq zarba yo‘lladi.
Ikkinchi bo‘lim mezbonlarning hujumlari bilan boshlandi. 55-daqiqada Temur Ismoilov yana bir gol urib, «dubl» sohibi bo‘ldi. Ammo, oradan biroz o‘tgach, «Norin» yana hisobni qisqartirdi. Tojiddinov darvozabon qaytargan to‘pga hammadan birinchi bo‘lib yetib kelib, uni to‘rga kiritdi - 3:2.
Hisob yana qaltis ko‘rinishga kelganidan so‘ng, bosh murabbiy Aleksandr Yejov tarkibda bir necha o‘zgarishlarni amalga oshirdi. Bu esa o‘z samarasini berdi. 75-daqiqada Sardor Matmuratov, 88-daqiqada Temur Bekchanov va hakam tomonidan qo‘shib berilgan daqiqalarda Sarvar Jumaniyazov tomonidan urilgan gollar hisobni yirik ko‘rinishga keltirdi.
Bu natijadan so‘ng, «Xorazm» 16 ochko bilan musobaqa jadvalidagi 5-o‘rinni saqlab qoldi. «Norin» 10 ochko bilan 8-o‘rinni egallab turibdi.
O‘yindan so‘ng, «Xorazm» klubi bosh murabbiyi Aleksandr Yejov «Xorazm FK muxlislari»ga intervyu berdi.
«Norin»ga qarshi o‘yin qiyin kechdi. Bu jamoaning Nukusdagi o‘yinini ko‘rgan edik, 1:3 hisobida yutqazib turib, 3:3 hisobida durangga erishgandi. Shu tufayli, bugungi o‘yinda ham keskinlik saqlanib turdi.
Birinchi bo‘limda ko‘plab vaziyatlardan unumli foydalanganimizda, hisob yirikroq bo‘lishi, biz esa xotirjam o‘ynashimiz mumkin edi. Ammo oxirda gol o‘tkazib yubordik, natijada hisob qisqardi.
Tanaffusda yigitlarga xotirjamlikka berilmaslikni, oxirigacha kurashish lozimligini tushuntirdim. Ikkinchi bo‘limda diqqat-e’tiborni kuchaytirib, ijobiy natijaga erishdik. Yigitlardan minnatdorman, jamoamiz juda ahil.
O‘z uyimizdagi o‘yinlarda 12-o‘yinchimiz ham bor, bular - muxlislarimiz. Albatta, yigitlar ba’zan xatoga yo‘l qo‘yadi, gohida gol o‘tkazadi. Ammo, muxlislar har doim bizni oldinga chorlab turadi. Biz bunday muxlislikdan xursandmiz, hatto tanaffus paytida, kiyinish xonasida ham hamma muxlislar uchun o‘ynash lozimligini, ularni xursand qilishimiz shartligini bir-birimizga eslatamiz, uqtiramiz. Bizni qo‘llab-quvvatlab turgan muxlislarga katta rahmat aytamiz, ulardan minnatdormiz» - dedi Yejov.
Pro-liga, 15-tur
17 iyun, Urganch, «Yoshlik» sport majmuasi, 950 tomoshabin
XORAZM (Urganch) - NORIN (Haqqulobod) - 6:2
Gollar: Temur Ismoilov (29,55), Oybek Nurboyev (38), Sardor Matmuratov (75), Temur Bekchanov (88), Sarvar Jumaniyazov (90+1) - Murtazoyev (45), Tojiddinov (63)
