Panama termasining uy uchrashuvlarida muxlislar Blas Peresni «Su-Per-Ra-Ton!» hayqirig‘i ostida qarshi olishga o‘rganishgan. Aniqroq aytganda, ushbu futbolchining jussasi sabab «Kuchli sichqon bolasi» deb atashadi.
U bunday taxallusni ilk marta 17 yoshida «Panama Vyexo» stadionida olgan. Uning golni nishonlash odati ham o‘zgacha: Peres cho‘kkalab, qo‘lini boshiga shox qilib qo‘yadi - bu oilasiga qaratilgan o‘ziga xos ishora, chunki Blasning otasini «buqa» deb chaqirishardi.
Oradan 20 yil o‘tib, ulg‘ayganiga qaramay, Peresning «Kuchli sichqon bolasi» taxallusi hamon saqlanib turibdi. Asosan yoshi katta futbolchilar o‘rin olgan Panama termasida Blas eng tajribalisi sanaladi: uning yoshi 37da, bugungi kungacha milliy jamoada 117ta o‘yin o‘tkazib, mamlakat tarixidagi eng yaxshi to‘purar maqomiga erishgan.
Aksariyat panamaliklarga xos vatanparvarlik tuyg‘usi esa Peresdagi motivasiyani yanada oshiradi. «Odamlarso‘rashadi: «NimagatananggaPanamabayrog‘inichizdirgansan? Aqldan ozibsan». Yo‘q, menga bu haqiqatan ham yoqadi. O‘z yurtimni juda sevaman». Suratning tagida Panameco - panamalik yozuvi ham bor.
Panamadan katta futbolga kirib borish juda mushkul - JCH-2018ga yo‘l olgan termada Yevropa klublarida to‘p suradigan futbolchilar yo‘q, jamoaning eng yaxshi o‘yinchilari esa MLSda asosan zaxira o‘rindig‘ida o‘tirishadi. Blas «Ko‘hna qit’a»da bir yil to‘p surishga ulgurgan.
2007 yilning yozida uni «Erkules» o‘z safiga qo‘shib olgandi. Peresning «Deportivo Kukuta» tarkibida Libertadores kubogida ko‘rsatgan o‘yinlaridan yorqin taassurot olgan jamoa vakillari uning transferiga 1,1 mln. yevro sarflashdi.
Bu klub uchun rekord summa hisoblangandi. «Erkules» muxlislari esa tanishtiruv marosimida Blasni an’anaviy hayqiriq - «Su-Per-Ra-Ton!» bilan qarshi olishdi. Yarim yildan so‘ng Peres transferga qo‘yishlarini so‘radi, chunki uyiga yaqin joyda to‘p surishni xohlagandi.
Ispaniya va BAAni hisobga olmaganda, qahramonimiz asosan Markaziy va Janubiy Amerika ligalarida faoliyat yuritdi. Hattoki, MLSga ko‘chib o‘tayotganida ham Blas tug‘ilib-o‘sgan maskaniga yaqin hududda bo‘lishga intildi - shu bois Dallasni tanlab, ispan tilida so‘zlashuvchi jamiyatga tezda moslashdi.
Darhaqiqat, Peres o‘z yurtiga juda bog‘lanib qolgan. «Panama Vyexo»da debyut qilishidan ikki yil avval Blas San-Migelitoda avtomobillar yuvish bilan shug‘ullanib, shu tariqa qashshoq oilasiga ko‘maklashdi.
Bu paytda futbolchilikka qadam qo‘yishiga ishonchi komil emasdi - maktabda Peresni yaxshi kamonchi deya e’tirof etib, Panama termasining bo‘lajak yulduzini futboldan chalg‘itishardi.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
