Shu yilning avgust-sentyabr oylarida Indoneziyada bo‘lib o‘tadigan Osiyo o‘yinlariga tayyorgarlik ko‘rayotgan O‘zbekiston olimpiya terma jamoasi o‘quv-mashg‘ulot yig‘inini o‘tkazish uchun Turkiyaga yo‘l olgani haqida xabar berib o‘tgandik.
Terma jamoamiz vakillari Turkiyaning Kartepe shahrida kuniga ikki mahal mashg‘ulot olib borishmoqda. Kunning birinchi qismida asosan jismoniy tayyorgarlikka urg‘u berilyapti. Futbolchilar yugurish mashqlarini bajarish orqali chidamlilik va tezkorlikni oshirishga harakat qilishmoqda.
Kunning ikkinchi qismida esa dastlab trenajyorda mashg‘ulotlar olib borilmoqda. Keyin esa maydonda texnik va taktik amaliyotlar bajarilyapti.
Rejaga ko‘ra ushbu o‘quv-mashg‘ulot yig‘ini 29 iyunga qadar davom etib, futbolchilarimiz yig‘in davomida bir qator nazorat uchrashuvlarida maydonga tushishi rejalashtirilgan.
O‘zbekiston olimpiya terma jamoasi oldiga Osiyo o‘yinlarida ijobiy natija ko‘rsatish bilan bir qatorda 2020 yil Tokioda bo‘lib o‘tadigan Olimpiadaga yo‘llanmani qo‘lga kiritish vazifasi qo‘yilgan.
