JCH-2018 guruh bosqichi 2-turi doirasidagi Argentina - Xorvatiya o‘yini kutilganidek, o‘ta yuqori sur’at ostida, ancha asabiy ruhda o‘tdi.
Xorxe Sampaoli shogirdlari to‘pni ko‘proq nazorat qilib, kombinasion hujumlar tashkil qilgan bo‘lsalar, xorvatlar ularni tezkor qarshi yurishlar bilan rosa qiynashdi.
Tanaffusga qadar hisobdagi tenglik saqlanib turdi, ikkinchi bo‘limda esa bizga OCHL orqali tanish murabbiy - Zlatko Dalich shogirdlari Lionel Messi va uning sheriklarini shunchaki, «tiz cho‘ktirishdi». Yo‘q, hozir ko‘pchilik tomosha qilgan uchrashuvni atroflicha sharhlamoqchi emasmiz, albatta.
Shunchaki, hamyurtimiz Ravshan Ermatovning mohirona hakamligi va bu borada yuzaga kelgan munosabatlarga birrov to‘xtalib o‘tishni lozim topdik. Yetakchi referimiz butun bahs davomida nazoratni qo‘ldan chiqarmay, o‘yin sur’ati tushmasligini ta’minladi.
Xususan, ko‘rsatilgan 7ta sariq kartochka qanday asosga egaligini futbolchilarga tushuntirib ham berdi, vaziyat taqozosiga ko‘ra. Shunga muvofiq, har ikki jamoa vakillari hakamlikka nisbatan jiddiy e’tirozlar bildirishmadi.
Biroq hammasi Lionel Messi va Argentina termasiga muxlislik qilgan rossiyalik sharhlovchi Vasiliy Utkin tomonidan aytilgan nomaqbul (noprofessional) mulohazalardan so‘ng boshlandi.
Utkin misolida futbol sharhlovchisi betaraf bo‘lishi shart qabilidagi tushuncha yo‘qolib borayotganinga ishonch hosil qildik...
Lavha №1. Futbol sharhlovchisi Vasiliy Utkin Twitter ijtimoiy tarmog‘idagi shaxsiy sahifasida Argentina - Xorvatiya uchrashuvini binoyidek boshqargan Ravshan Ermatovni haqoratladi. U referining ma’lum vaziyatda futbolchiga darhol sariq kartochka ko‘rsatmaganidan norozi bo‘ldi.
Keyinroq Utkin o‘ylamay yozgan fikrini yumshatish uchun yana bir «tvit» qoldirdi: «Mana, Ravshan Ermatov, bo‘larkan-ku. Aqlni ishlatish hech qachon kech emas. Kechirildi, bingo!!» Uchrashuvning ertasi kuni Utkin nomaqbul fikrlarini barcha muxlislar ham hakamlarni haqorat qilishlari, bu tabiiy hol ekanligi bilan izohladi.
Ya’ni Ermatovni himoya qilganlarga oddiy javob berdi: «Mening ishqibozlik qilishimga xalal bermanglar». Tabiiyki, muxlislar Utkinning noxolis yondashuviga jiddiy e’tiroz bildirib, undan uzr so‘rashni talab qildilar. Ta’kidlash joiz, sharhlovchi «Tvitter»da minglab haqoratlar ostida qoldi va unga salbiy munosabatlar tinimsiz davom etdi.
Lavha № 2. O‘yin davomida Ravshan Ermatov sha’niga nojoiz so‘zlar ishlatgan Utkin muxlislarni to‘g‘ridan-to‘g‘ri efirga taklif qildi. Chunonchi, u «Tvitter» ijtimoiy tarmog‘idagi javob haqoratlariga chidolmadi shekilli.
«Hurmatli o‘zbek muxlislari! Sizlarning haqoratlaringizni qabul qilish va savollaringizga javob berish uchun soat 11:40 yoki bir necha daqiqadan so‘ng maxsus «insta»da jonli efirga chiqaman. Ura», - deb yozdi Utkin.
Lavha № 3. «Instagram»dagi debat. Vasiliy Utkin «Telegram» kanali orqali muxlislarga murojaat qildi:
- Mening jonli efirimga ulgurmaydigan, kelmaydigan, xohlamaydiganlar, sabrsizlar uchun, shuningdek, eshitishdan ko‘ra, o‘qishni qulay biluvchilar uchun.
Men ... (...), ..., yuvindixonadan topilgan, oilamning sharmandasi, mol, to‘ng‘iz va hokazoman. O‘z haqoratingizni «Instagram» direkti (boshqaruvi)ga yozib qoldiring, eng yaxshisini tanlab, alohida e’lon qilaman.
Ijodkorlardek so‘kining. Meni istaganingizcha so‘kishga to‘la haqlisiz. Eng yomon so‘zlar bilan. Shunday qilyapsiz ham - sharhlovchi hakam kabidir. Taxminlarim to‘g‘ri chiqmasa, doim shunday qilib kelgansiz.
Men ablahman, men... jirkanchman, sizlar ta’riflagan har narsaman...
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
