O‘zbekistonlik yosh shaxmatchilar Minskdagi jahon chempionatida umumjamoa hisobida birinchi bo‘lishdi. Bu haqda Milliy olimpiya qo‘mitasi Matbuot xizmati xabar bermoqda.
 
Belarus poytaxti Minsk shahrida shaxmatning blis va rapid yo‘nalishi bo‘yicha o‘smirlar o‘rtasidagi II jahon chempionati nihoyasiga yetdi. Ushbu musobaqada o‘zbekistonlik yosh shaxmatchilar ham ishtirok etdilar va Vatanga medallar shodasi bilan qaytadigan bo‘lishdi.
 
O‘zbekistonlik shahmatchilar rapid yo‘nalishidagi bahslarda 2 ta oltin (Humoyun Begmurotov, Umida Omonova), 2 ta kumush (Afro‘za Hamdamova, Olmos Rahmatullayev), blis bellashuvlarida esa 3 ta oltin (Humoyun Begmuratov, Afro‘za Hamdamova, Umida Omonova) hamda 2ta kumush (Ruqiya Olimova, Shahrombek Karimov) medallarini qo‘lga kiritishdi.
 
Umumiy 9 ta medalga ega chiqqan O‘zbekiston terma jamoasi o‘smirlar o‘rtasidagi jahon chempionatida umumjamoa hisobida birinchi o‘rinni egalladilar. Terma jamoamizdan so‘ng ikkinchi o‘rinni rossiyalik shaxmatchilar band etgan bo‘lsalar, kuchli uchlikka ukrainalik sportchilar yakun yasashdi.

“O‘zbekiston Milliy olimpiya qo‘mitasi ushbu muvaffaqiyat bilan O‘zbekiston shaxmat federasiyasi, terma jamoamiz murabbiylar shtabi, chempion sportchilarimiz va ularning ota-onalarini muborakbod etadi”, deya yozadi MOQ Matbuot xizmati.