Jahon chempionatining "D" guruhidagi intriga so‘nggi soniyalargacha saqlanib qolgani bilan yodda qoladigan bo‘ldi. Musobaqani juda yomon boshlagan Argentina terma jamoasi yakunda keyingi bosqichga chiqishga muvaffaq bo‘ldi.

Argentinaliklar nihoyat o‘z o‘yinlarini topgandek bo‘lishdi. Ular Nigeriyaga qarshi bahsning 15-daqiqasida hisobni ochishdi. Banega maydon markazidan oldingi chiziqqa uzatma berdi. Messi himoyachilar ortidan otilib chiqdi, to‘pni egalladi va yakkama-yakka vaziyatda o‘ng oyoqda zarba berib, darvozani ishg‘ol qildi. Bu Lionelning JCH-2018dagi ilk goli edi.

Uchrashuvning 34-daqiqasida raqib himoyachilari o‘z jarima maydonchalari ostonasida Di Mariyani chalib yiqitishdi. Leo Messi tomonidan yo‘llangan zarba natijasida to‘p darvoza ustuniga tegib qaytdi.

Ikkinchi bo‘lim boshida tajribali Xavyer Maskerano "qovun" tushirdi. Nigeriyaliklar burchak to‘pini o‘yinga kiritgan paytda "Barsa"ning sobiq himoyachisi raqib hujumchisini qo‘li bilan tortib yiqitdi. Belgilangan penaltini Viktor Mozes xotirjamlik bilan amalga oshirib, muvozanatni tikladi.

Bu gol "albisileste"ga ruhan salbiy ta’sir ko‘rsatgan bo‘lsa, afrikaliklar himoyada ishonch bilan harakatlana boshladilar. Qarshi hujumda esa ular hattoki gol urishga yaqin keldilar. O‘yin tugashiga 7 daqiqa qolganida Igalo o‘tkir burchak ostida Argentina posboni Armani bilan yakkama-yakka vaziyatga chiqdi va zarba berdi. Darvozabon esa zarbani qaytarishga muvaffaq bo‘ldi.

O‘yin tugashiga 5 daqiqa qolganida esa Xorxe Sampaoli shogirdlari g‘alabani ilib ketishga muvaffaq bo‘lishdi. O‘ng qanotdan yetkazilgan uzatmani Markos Roxo yerga tushirmasdan Nigeriya darvozasiga joylab qo‘ydi.

Bu paytda parallel kechayotgan Islandiya-Xorvatiya bahsida durang qayd etilayotgan edi. Agar Islandlar bitta gol urib, g‘alaba qozonishganida pley-offga ular yo‘l olishardi. Ammo xorvatlar tezda gol urishdi va Argentinaga biroz xotirjamlik bag‘ishladi. Messi jamoadoshlari so‘nggi daqiqalarda to‘ni nazorat qilish evaziga vaqtni cho‘zdi va g‘alabani saqlab qoldi.

Shu tariqa, Argentina terma jumoasi juda katta qiyinchilik bilan "D" guruhidan pley-offga chiqdi. Nimchorak finalda ularni Fransiya terma jamoasi kutib turibdi.

JCH-2018, "D" guruhi, 3-tur
Nigeriya – Argentina 1:2 (0:1)
Gollar: 0:1 – 14 Messi, 1:1 – 51, penalti Mozes, 1:2 – 86 Roxo.
Nigeriya – Uzoxo, Balogun, Omeruo (Ivobi, 90), Idovu, Trost-Ekong, Mozes, Ndidi, Etebo, Obi Mikel, Musa (Nvankvo, 90), Ixeanacho (Igalo, 46).
Argentina – Armani, Roxo, Otamendi, Talyafiko (Aguero, 80), Maskerano, Peres (Pavon, 61), Banega, Di Mariya (Mesa, 72), Merkado, Messi, Iguain.
Ogohlantirishlar: Balogun (32), Maskerano (49), Banega (64), Obi Mikel (90), Messi (90).