O‘zbekiston futbol assosiasiyasi 1-vise Prezidenti va Markaziy Osiyo futbol assosiasiyasi Prezidenti Umid Ahmadjonovning tashabbusi bilan joriy yilning 3-10 iyul kunlari poytahtimiz tarixda birinchi marta mintaqa chempionatiga mezbonlik qiladi.
16 yoshgacha bo‘lgan futbolchilardan tashkil topgan O‘zbekiston, Tojikiston, Afg‘oniston va Qirg‘iziston terma jamoalari Toshkentdagi "Milliy" stadionida tashkil etilayotgan “CAFA U-16 championship” musobaqasida kuch sinashishadi. Musobaqa davomida Markaziy Osiyodagi kamida "V" toifaga ega murabbiylar uchun o‘quv kurslari tashkil etiladi. Bu o‘quv kurslarida Markaziy Osiyo futbol assosiasiyasiga a’zo mamlakatlarning 2 nafardan vakili hamda o‘zbekistonlik vakillar ishtirok etishadi. O‘quv kurslarini OFK instruktori Islom Ahmedov va OFK texnik qo‘mitasi a’zosi Shovkat Imamovlar olib borishadi.
"Markaziy Osiyo murabbiylari uchun bu kabi o‘quv kurslari O‘zbekistonda birinchi marta tashkil qilinmoqda. Bundan maqsad, nafaqat O‘zbekistonda, balki mintaqada futbolning rivojlanishiga hissa qo‘shish, murabbiylar malakasini oshirish, futbol rivojini yangi bosqichga olib chiqishdan iborat. Ishonchim komilki, bu kabi sa’y-harakatlar albatta o‘z samarasini beradi", - deydi Markaziy Osiyo futbol assosiasiyasi Prezidenti va O‘FA birinchi vise-prezidenti Umid Ahmadjonov.
