O‘zbekiston Milliy olimpiya qo‘mitasi Prezidenti, mamlakat futbol assosiasiyasi birinchi vise-prezidenti Umid Ahmadjonov o‘zbek futboli boshqaruvini qo‘lga olganidan so‘ng ishni futbol oilasi bilan yaqindan tanishishdan boshlagan edi. Bu borada Umid Mahamadjonovich FIFA Prezidenti Janni Infantinoning taklifiga ko‘ra Syurixga tashrif buyurib, FIFA strukturasi bilan yaqindan tanishgan va yaqin hamkorlik aloqalarini o‘rnatgan edi. Buning samarasi o‘laroq O‘zbekiston terma jamoasi kuchli sparring raqiblar bilan o‘rtoqlik uchrashuvlari tashkil eta oldi. Jumladan, bevosita Infantinoning yordami bilan jahon chempionati ishtirokchilari Senegal, Marokash va Urugvay terma jamoalariga qarshi o‘rtoqlik uchrashuvlari o‘tkazdi.

Endi esa Umid Ahmadjonov Shveysariyaga Xalqaro olimpiya qo‘mitasi rahbari Tomas Baxning taklifiga ko‘ra yo‘l olmoqda. XOQ qarorgohi joylashgan Lozannada Umid Ahmadjonov Tomas Bax bilan uchrashuv o‘tkazadi, butun dunyo Olimpiya oilasi va Olimpiya harakati bilan yaqindan tanishadi. Buenos-Ayres va Tokioda bo‘lib o‘tadigan Olimpiya o‘yinlariga ko‘rilayotgan tayyorgarlik hususida fikr almashadi, qolaversa dunyo sportida yuz berayotgan yangiliklardan boxabar bo‘ladi va albatta xalqaro aloqalarni mustahkamllash yo‘lida o‘ziga xos ko‘prik o‘rnatadi.

Albatta bu hamkorlik yaqin vaqt ichida o‘z samarasini berishi aniq. O‘zbekiston nufuzli xalqaro sport tashkilotlari bilan hamkorlik qilishdan manfaatdor. Shveysariyaga amalga oshirilayotgan tashrif har tomonlama unumli va samarali bo‘lishini kutib qolamiz.

MOQ rahbarining Shveysariyaga tashrifi, u yerda o‘tkaziladigan muzokaralar natijasi bilan Milliy olimpiya qo‘mitasining rasmiy sayti orqali xabardor bo‘lib borishingiz mumkin bo‘ladi.