Xabaringiz bor, bugun Rossiyada davom etayotgan futbol bo‘yicha jahon chempionati 1/8 boschiqi doirasida Belgiya — Yaponiya terma jamoalari o‘rtasidagi bahs bo‘lib o‘tadi.

Bu mazkur terma jamoalar o‘rtasidagi o‘zaro oltinchi uchrashuv hisoblanadi. Bungacha Belgiya va Yaponiya besh marta bir-biriga qarshi maydonga chiqqan.

Jumladan, 1999 yil 3 iyunda Kirin kubogi musobaqasida Yaponiya — Belgiya bilan durang (0:0) o‘ynagan.

2002 yilgi jahon chempionati doirasidagi bahsda ham ushbu jamoalar o‘rtasida bahsda g‘olib nomi aniqlanmagan — 2:2.

2009 yilgi Kirin kubogi doirasidagi o‘yinda esa Yaponiya Belgiyani 4:0 hisobida mag‘lubiyatga uchratgan.

Shuningdek, mazkur terma jamoalar o‘rtasida ikkita o‘rtoqlik uchrashuv o‘tkazilgan. 2013 yilda tashkil etilgan bahsda Belgiya maydonida Yaponiya 2:3 hisobida g‘alabaga erishgan.

2017 yildagi esa Belgiya o‘z maydonida Yaponiyani 1:0 hisobida yenggan.

Statistikaga e’tibor qaratsak o‘zaro o‘yinlarda Yaponiyada yaxshiroq ko‘rsatkich — ikkita g‘alaba. Ammo bu safar ekspertlar, mutaxassislar, va hatto muxlislar ham Belgiyaning imkoniyatini yuqori baholashmoqda. Chunki Tibo Kurtua, Edin Azar, Romelo Lukaku, Kevin de Bryuyne, Mussa Dembele kabi yulduzlari bo‘lgan Belgiyaning bu bosqichdan o‘tishiga hech kim shubha qilmayapti.

Ammo “Maydon tekis, to‘p yumaloq”, deganlaridek Yaponiya terma jamoasini ham osonlikcha taslim bo‘lmaydi. Qolaversa, jahon chempionatida yuqori natijalar uchun kurashayotgan qit’amizning yagona vakili Belgiya bilan bellashish, Belgiyani mag‘lubiyatga uchratish borasida yaxshigina tajriba to‘plagan.

Belgiya — Yaponiya o‘yini bugun Toshkent vaqti bilan 23:00 da boshlanadi.