O‘zbekistonlik yosh suzuvchilar Bolgariya poytaxti Sofiya shahridagi xalqaro musobaqada ishtirok etayotganliklari haqida xabar bergandik. III yozgi o‘smirlar Olimpiya o‘yinlariga yo‘llanmalar uchun reyting ochkolari taqdim etadigan musobaqada O‘zbekiston, Buyuk Britaniya, Rossiya, Xorvatiya, Litva, Germaniya, Bolgariya kabi mamlakatlardan 370 dan ortiq sportchi ishtirok etdi.
Quvonarlisi, suzuvchilarimiz turnir davomida umumiy hisobda 7ta medal qo‘lga kiritishdi.
Hamyurtlarimizdan Aleksey Sidorchuk 50 metr brass usulida suzish bahslarida 3-o‘rin, Ahmadjon Umurov 100 metr erkin usulda 2-o‘rin sohibi bo‘ldi. Qizlarimizdan esa Yulduz Qo‘chqorova 100 metrga chalqancha usulda suzishda 2-o‘rin, 50 metrga chalqancha suzishda esa 3-o‘rinni qo‘lga kiritdi. Natalya Kritinina erkin usulda 50 metr masofaga suzish bahslarida 3-pog‘onadan joy oldi. Shuningdek, 50 metrga batterflyay suzish bo‘yicha Mirsaid Mirzoidov ikkinchi bo‘ldi. 50 metrga erkin usulda suzish bo‘yicha o‘g‘il bolalar o‘rtasida Muhamedjan Abdijalilov uchinchi pog‘onadan joy oldi.
Musobaqa davomida sportchilarimiz o‘zlari uchun muhim bo‘lgan reyting ochkolarini ishlab oldilar. Xalqaro suzish federasiyasi (FINA) 3 avgust kuni yo‘llanma egalari ro‘yxatini ma’lum qiladi.
