Belgiya terma jamoasining JCH-2018 hisobidan urgan ilk goli muallifi hayotda olijanoblikni birinchi o‘ringa qo‘yadi. U doimo atrofidagilarga yordam qo‘lini cho‘zishga tayyor, shuningdek, hazil-mutoyibani ham xush ko‘radi.
bombardir.ru sayti ijodkorlari «Napoli» vakili tomonidan Panama termasi darvozasiga urilgan chiroyli goldan o‘zgacha ilhomlanib, uning e’tibor va e’tirofga munosib xatti-harakatlariga nazar solishdi.
Qutqarilgan it sharafiga gol
Dris Mertens klub futbolida urgan gollaridan birini antiqa usulda nishonladi - burchak bayroqchasi atrofida «vovullab», insonning to‘rt oyoqli do‘sti - it qiyofasini ko‘rsatdi. Tabiiyki, muxlislar avvaliga hech narsani tushunmay, hayron qolishdi, keyin bu harakat mohiyatidan xabar topib, futbolchiga tasannolar aytishdi.
Ma’lum bo‘lishicha, belgiyalik hujumchi Neapolda itlarni boqishga mo‘ljallangan muassasa moliyaviy qiyinchiliklar tufayli yopilishi haqidagi xabarni eshitgani zahoti turmush o‘rtog‘i Katrin bilan birga u yerga borib, kerakli miqdorda xayriya qilgan.
Qolaversa, himoyaga muhtoj itlardan birini o‘z qaramog‘iga olgan. Futbolchi keyinroq «Instagram» tarmog‘i orqali ommaga murojaat etishni unutmadi: «Iltimos, ushbu muassasada saqlanayotgan itlarga yangi qo‘nimgoh topishda yordam beringlar».
Och qolganlarga pissa
Dris Mertens bir safar o‘z do‘sti bilan Neapol markaziy vokzaliga borib, u yerda ochlikdan tinkasi qurigan kishilarga pissa tarqatib chiqdi. Diqqatga sazovor tomoni shuki, u bu bilan omma nazariga tushishni o‘ylagan emas, aksincha, kimdir tanib qolmasligi uchun imidjini mutlaqo o‘zgartirgan ham.
Ya’ni oddiyroq kiyinishdan tashqari, katta qora ko‘zoynak ta’qib olgan. Uning bu harakati oradan ancha o‘tib, tasodifan oshkor bo‘ldi. Qisqasi, Mertens mashhurlikni uncha yoqtirmaydi va xayrli ishlarini imkon qadar pinhona amalga oshiradi. Belgiyalik yigitning yana necha marta bu kabi mehr-muruvvat ko‘rsatgani o‘ziga ayon.
Xayriya - insoniylik belgisi
Mertensni Neapol va uning atrofidagi shifoxonalarda tez-tez uchratishadi. Deylik, uning onkologiya bo‘limiga kirib, og‘ir xastalik bilan kurashayotgan bemorlar ko‘nglini ko‘targani, do‘stona muloqot orqali xushkayfiyat ulashgani ma’lum.
Shuningdek, OAV vakillarining aniqlashlaricha, Venesuela iqtisodiyoti katta inqirozga uchragan vaqt futbolchi ushbu mamlakatga o‘z hisobidan dori-darmonlar yuborgandi.
Afrikaga jo‘natma
Bunisi ham tasodif. Mertens televizor tomosha qilib o‘tirib, to‘satdan o‘z futbolkasida yurgan yigitga e’tibor qaratadi. Bu lavhada uzoq Gvineyadagi kambag‘al oilalar hayoti ko‘rsatilgandi.
Xullas, erinmagan Dris National Geographic ko‘rsatuvi suratkashi bilan aloqaga chiqib, o‘sha bolakay manzilini oladi va unga sport ekipirovkalaridan 42 to‘plami, shuningdek, har bir sinfdoshiga «Napoli»ning 1tadan futbolkasini pochta orqali jo‘natadi.
Belgiyada futbol maktablari tarmog‘i
Dris o‘z yurtida terma jamoadagi do‘stlari - Yan Vertongen va Muso Dembele bilan hamkorlikda katta futbol maktablari tarmog‘ini ochdi. Hozir bu dargohlarda belgiyalik minglab bolalar yaxshi sharoitlarda shug‘ullanib, talab darajasida ta’lim olishmoqda.
Demak, agar Belgiya termasi yana 20 yildan keyin ham jahon chempionati favoritlari qatorida tilga olinsa, bunda Thefuture tarmog‘i, xususan, Mertensning ulushi ham bo‘ladi.
Sadoqat va muhabbat tushunchasi
Mertensni vaqtida APLga chorlashdi. Aniqrog‘i, «Vest Xem» unga manfaatli taklif bilan murojaat qildi, biroq belgiyalik futbolchi Neapolda qolishni ma’qul ko‘rdi.
Garchi Radio CRC jurnalisti Raffaele Oryemma futbolchining qarorini boshqacha izohlagan bo‘lsada («Uni Italiyada qolishga turmush o‘rtog‘i ko‘ndirdi»), ko‘pchilik Dris «Napoli»ga sodiq ekanligiyu, Neapolni qattiq sevishini juda yaxshi biladi. Shunday ekan, avvalo, Mertensning o‘zi ketishni istamagan.
Hazil-mutoyiba, quvnoqlik
Belgiya termasi vakili hazillashishni ham o‘rniga qo‘yadi. Misol uchun, bir safar ijtimoiy tarmoqqa o‘zi olgan kulguli suratni joylashtirib, ostiga qiziqarli izoh yozdi: «Turmush o‘rtog‘im pardoz-andozsiz shunday ko‘rinadi».
Katrin esa bunga tezda javob qaytardi: «Erimning uydagi surati ko‘rishga ham arzimaydi...». Ajoyib munosabat!
Maydonda ham hazil
Belgiya va Gresiya terma jamoalari o‘rtasidagi uchrashuvda raqib futbolchisi Georgios Savellas qahramonimizdan biroz ranjidi. Gap shundaki, Dris uning burnidan tortib qo‘ygandi. Muhimi, quvnoq futbolchi bu harakatini hazilga yo‘yib, mojaroga yo‘l qo‘ymadi.
Chiroyli gol
Mertens Belgiya termasining JCH-2018dagi gollari hisobini antiqa zarbasi bilan ochib berdi. Uning panamaliklar kiperiga «sovg‘a»si hali ekranlarda ko‘p aylantirilishi tayin.
Balki Dris yakunda turnirning eng chiroyli gollaridan biri muallifi sifatida e’tirof etilar. Qoyilmaqom trayektoriya va benazir gol!
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
