Xabaringiz bor, so‘nggi paytlarda Milliy olimpiya qo‘mitasi sportni eng quyi bo‘g‘indan boshlab ommalashtirish yo‘lida bir qator sport federasiyalari bilan birgalikda turli tadbirlar tashkil etib kelmoqda. Bugungi kungacha taekvondo WTF, boks, karate, velosport, gandbol, sport kurashlari, suzish va boshqa sport turlari bo‘yicha mahorat saboqlari, ko‘rgazmali chiqishlar o‘tkazildi.
Navbatdagi tadbir O‘zbekiston stol tennisi federasiyasi bilan hamkorlikda tashkil etildi. Unda stol tennisi bo‘yicha O‘zbekiston terma jamoasining yetakchi sportchilari, murabbiy va mutaxassislar poytaxtimizda joylashgan «Erkatoy» maktabgacha ta’lim muassasasi tarbiyalanuvchilar uchun master-klass namoyish etib berishdi. Bolajonlar uchun qay tarzda sportning ushbu turi bilan shug‘ullanish, stol tennisi haqidagi qiziqarli ma’lumotlarni gapirib berishdi.
O‘z navbatida bolakaylar ushbu tadbirda maroq bilan ishtirok etishdi va bir olam taassurotlar olishdi.
