O‘zbekiston futbol assosiasiyasi tomonidan yurtimizdagi hakamlar saviyasini oshirish va futbol uchrashuvlarida sifatli hakamlikni ta’minlash uchun bir qator chora-tadbirlarni amalga oshirmoqda.

Jumladan, Superliga hamda Pro-liga uchrashuvlarini boshqarayotgan bosh hakamlar, ularning yordamchilari jismoniy tayyorgarlik bo‘yicha test-sinovlari hamda nazariy bilimlar bo‘yicha imtihonlar topshirishgani haqida xabar berib o‘tgan edik.

Test-sinovlarini O‘FA Hakamlar va nazoratchilar boshqarmasi boshlig‘i Ma’mur Saidqosimov va boshqarma mutaxassislari Baxtiyor Namozov hamda Bobur Haydarovlar olishgan edi.

Sinovlar natijalariga ko‘ra, 25 iyundan 30 iyungacha 40 nafar hakamlar va yordamchilaridan imtihon olinib, 3 ta bosh hakam va 2 ta yordamchi hakam fitnes test topshira olmagan bo‘lsa, 2 nafar yordamchi hakam nazariy imtihondan o‘ta olmadi.

3-4 iyul kunlari imtihon topshirgan 34 inspektordan 10 nafari nazariy imtihondan o‘ta olmadi. 4-6 iyul kunlaridagi imtihonlarda 37 nafar hakam ishtirok etib, 1 nafar bosh hakam fitnes testdan, 4 nafar yordamchi hakam nazariy imtihondan o‘ta olishmadi.

Imtihonlardan o‘ta olmagan hakamlar Superliga hamda Pro-liga o‘yinlaridan chetlashtirildi.