Ўзбекистон футбол ассоциацияси томонидан юртимиздаги ҳакамлар савиясини ошириш ва футбол учрашувларида сифатли ҳакамликни таъминлаш учун бир қатор чора-тадбирларни амалга оширмоқда.

Жумладан, Суперлига ҳамда Про-лига учрашувларини бошқараётган бош ҳакамлар, уларнинг ёрдамчилари жисмоний тайёргарлик бўйича тест-синовлари ҳамда назарий билимлар бўйича имтиҳонлар топширишгани ҳақида хабар бериб ўтган эдик.

Тест-синовларини ЎФА Ҳакамлар ва назоратчилар бошқармаси бошлиғи Маъмур Саидқосимов ва бошқарма мутахассислари Бахтиёр Намозов ҳамда Бобур Ҳайдаровлар олишган эди.

Синовлар натижаларига кўра, 25 июндан 30 июнгача 40 нафар ҳакамлар ва ёрдамчиларидан имтиҳон олиниб, 3 та бош ҳакам ва 2 та ёрдамчи ҳакам фитнес тест топшира олмаган бўлса, 2 нафар ёрдамчи ҳакам назарий имтиҳондан ўта олмади.

3-4 июль кунлари имтиҳон топширган 34 инспектордан 10 нафари назарий имтиҳондан ўта олмади. 4-6 июль кунларидаги имтиҳонларда 37 нафар ҳакам иштирок этиб, 1 нафар бош ҳакам фитнес тестдан, 4 нафар ёрдамчи ҳакам назарий имтиҳондан ўта олишмади.

Имтиҳонлардан ўта олмаган ҳакамлар Суперлига ҳамда Про-лига ўйинларидан четлаштирилди.