"Real" hujumchisi Krishtianu Ronaldu "Yuventus"ga o‘tish uchun "Qirollik klubi" prezidenti Florentino Peres tomonidan qo‘yilgan shartga rozi bo‘ldi. Portugaliyalik futbolchi o‘z xohishi bilan turinliklar safiga o‘tayotganini ommaga e’lon qiladigan bo‘ldi.

Manbaga ko‘ra, Ronaldu madridliklar xo‘jayini Florentino Peres bilan birga matbuot anjumanida qatnashadi va unda futbolchi o‘z xohishi bilan "Santyago Bernabeu"ni tark etishga qaror qilganini aytadi. Bundan tashqari, Krishtianu "Real" rahbariyati uni jamoada olib qolish uchun barcha ishni qilganini ta’kidlashi lozim.

Eslatib o‘tamiz, Ronalduning transferi Peres tufayli ortga surilib kelmoqda. "Real" prezidenti jamoa tarixidagi eng yaxshi futbolchini sotgan rahbar sifatida tarixdan o‘rin olishni istamayapti.

Italiya matbuoti tarqatgan xabarga ko‘ra, Krishtianu Ronaldu "Yuve" bilan 4 yillik shartnoma imzolaydi va yiliga 30 million yevro maosh oladi. "Keksa sinyora" mazkur transfer uchun "qaymoqranglilar"ga 100 million, futbolchining agentiga 20-25 million yevro to‘laydi.