“Mash’al” jamoasi yarim himoyachisi Nikita Pavlenko hamda klub o‘rtasida davom etayotgan kelishmovchilik 24 yoshli futbolchining murojaatiga asosan PFL tomonidan o‘rganib chiqildi.

Vaziyat atroflicha tahlil qilingach, 2017 yildan buyon “Mash’al” safida o‘ynab kelayotgan futbolchining jamoa safini tark etmoqchiligi, biroq klub uning ketishiga ruxsat bermayotgani ayon bo‘ldi. Gap shundaki, Nikita Pavlenkoning Muborak jamoasi bilan tuzgan shartnomasi yil so‘nggida nihoyasiga yetardi. Futbolchi amaldagi shartnomasi tugashiga 6 oydan kam muddat qolganida boshqa jamoa bilan muzokara o‘tkazish huquqiga ega ekanidan kelib chiqqan holda xorij klubi bilan kelishuvga erishgan. Lekin “Mash’al” futbolchini qo‘yib yuborishni istamadi.

Har ikki tomon bilan vaziyat chuqur tahlil qilindi va yakunda Pavlenkoning “Mash’al” bilan tuzgan shartnomasi 4.3 bandida agar futbolchi jamoadan olgan rag‘batlantirish mablag‘larini klubga qaytarsa, jamoadan ketishi mumkin ekani inobatga olinib,“Mash’al” va Nikita Pavlenko o‘rtasidagi shartnoma bekor qilindi. Futbolchi klub hisob-raqamiga olgan rag‘batlantirish pullarini o‘tkazib berdi. Har ikki tomon ham kelishmovchilikning ijobiy hal bo‘lganidan mamnunligini bildirdi.

- Faoliyatimni xorijda davom ettirish niyatim bor. Har qanday futbolchi ham o‘z kuchini chet elda sinab ko‘rishni istaydi. Biroq "Mash’al" bilan o‘rtada biroz kelishmovchilik yuzaga keldi. Har ikki tomonni ham tinglab, hech kimni hafa qilmaydigan qaror qabul qilinishida amaliy yordam ko‘rsatgan O‘FA va PFL rahbariyatiga o‘z minnatdorchiligimni bildiraman, - dedi 24 yoshli futbolchi.