"Chelsi" klubi rahbariyati bosh murabbiy Antonio Konteni iste’foga chiqardi. Iste’foning sabablari aniq bo‘ldi.

Konte klub rahbariyati bilan ko‘p kelishmovchiliklarga yo‘l qo‘ygan. Shu bois, jamoa italiyalik mutaxassis bilan sudlashmoqchi. Rahbariyatning fikricha, jumladan, murabbiy jamoadagi ba’zi futbolchilar bilan kelisha olmagan. Shu bois, «Chelsi» Konte shartnoma bandlarini buzgan, deb hisoblamoqda. Masalan, murabbiyning o‘tgan yilning iyun oyida Diyego Kosta bilan munosabati quyushqondan chiqib ketgan. Konte ispaniyalik futbolchiga SMS yuborib, unga umid qilmayotganini bildirgan.

Londonliklar italiyalik murabbiyga nisbatan ish ochishmoqchi. O‘z navbatida Kontening advokatlari murabbiyning huquqlarini himoya qilish bo‘yicha ish boshlab yuborishdi. Ular Kontega to‘lanishi kerak bo‘lgan 9 million funt sterling miqdorida kompensasiya pulini undirishga harakat qilishmoqda.

«Chelsi» shu paytgacha Konte bilan kompensasiya mablag‘i masalasida o‘zaro kelishuvga erishishga harakat qildi. Ammo tomonlar moliyaviy to‘lovlar borasida bir to‘xtamga kela olishmadi.

Antonio Konte «Chelsi» boshqaruvida 2 yil ishladi hamda APL va Angliya kubogida g‘olib chiqdi.