"Челси" клуби раҳбарияти бош мураббий Антонио Контени истеъфога чиқарди. Истеъфонинг сабаблари аниқ бўлди.

Конте клуб раҳбарияти билан кўп келишмовчиликларга йўл қўйган. Шу боис, жамоа италиялик мутахассис билан судлашмоқчи. Раҳбариятнинг фикрича, жумладан, мураббий жамоадаги баъзи футболчилар билан келиша олмаган. Шу боис, «Челси» Конте шартнома бандларини бузган, деб ҳисобламоқда. Масалан, мураббийнинг ўтган йилнинг июнь ойида Диего Коста билан муносабати қуюшқондан чиқиб кетган. Конте испаниялик футболчига SMS юбориб, унга умид қилмаётганини билдирган.

Лондонликлар италиялик мураббийга нисбатан иш очишмоқчи. Ўз навбатида Контенинг адвокатлари мураббийнинг ҳуқуқларини ҳимоя қилиш бўйича иш бошлаб юборишди. Улар Контега тўланиши керак бўлган 9 миллион фунт стерлинг миқдорида компенсация пулини ундиришга ҳаракат қилишмоқда.

«Челси» шу пайтгача Конте билан компенсация маблағи масаласида ўзаро келишувга эришишга ҳаракат қилди. Аммо томонлар молиявий тўловлар борасида бир тўхтамга кела олишмади.

Антонио Конте «Челси» бошқарувида 2 йил ишлади ҳамда АПЛ ва Англия кубогида ғолиб чиқди.