Amaldagi jahon chempioni - Germaniya termasi JCH-2018dagi ishtirokini juda barvaqt yakunladi. Tabiiyki, nemislarning guruh bosqichida qolib ketishlarini hech kim kutgan emasdi.
Qiziq, bundestim bosh murabbiyi Yoaxim Lyov koreyslarga qarshi kechgan tushunarsiz o‘yindan so‘ng muvaffaqiyatsizlikka qanday izoh berdi?
Asosiy sabablar haqida
- Hozir nima uchun vazifani uddalolmaganimiz haqida gapirishim og‘ir. Chunki g‘oyat tushkun kayfiyatdaman. Taqdir ekan, bu safar chempionlik bir yoqda tursin, nimchorak finalga ham chiqolmadik. Albatta, faqat g‘alaba haqida o‘ylagandik, lekin hisobni ocholmadik.
60-daqiqadan keyin esa shvedlarning gol urishganidan xabar keldi. Shunda futbolchilarni almashtirib, bosimni kuchaytirishga harakat qildim. Biroq oldingi chiziqda samaradorlik yetishmadi.
Jamoa tayyorgarligi haqida
- JCHni barvaqt yakunlash - Germaniya futboli uchun ulkan omadsizlik. Zero, musobaqaga yaxshi tayyorlanib, shunga yarasha unvonni saqlab qolishni rejalashtirgandik. O‘ylaymanki, kechagina barcha jamoalar bizning darajamizga chiqish ilinjida edi. Ammo bu yerda asl saviyamizni ko‘rsatolmadik.
Ha, gol urish uchun vaziyatlar yaratdik, lekin samara chiqarishda oqsadik. Jamoaga nima bo‘ldi? Endi shuni aniqlashimiz shart. 2006 yildan buyon yirik turnirlarda kuchli kvartetga kirayotgandik. Bu safar esa... Nachora, bugungi vaziyat va mag‘lubiyatni tan olishga majburmiz.
Boshlang‘ich tarkib va Ozil haqida
- Bir qator o‘yinchilar jarohatlanishgani sabab, boshlang‘ich tarkibni o‘zgartirishga to‘g‘ri keldi. Odatda jamoamiz yakuniy bosqichlarda ishonchliroq o‘yin ko‘rsatardi. Hozir nafaqat Ozil, balki ko‘plab yigitlarning talab darajasida to‘p surishmaganini ta’kidlash mumkin. Lekin barcha mas’uliyatni o‘z zimmamga olaman.
Tarkib chakki emasdi, deylik, Goreska mashg‘ulotlarda faollik ko‘rsatdi, Myuller esa avvalgi 2ta o‘yinda tinim bilmadi. Shuni inobatga olib, unga dam berdim. Ammo o‘yinimiz qovushmagach, Tomasni ham maydonga tushirdim. Gol urishimiz shart edi va bu himoyadagi o‘yinimizga ta’sir qildi, albatta.
Raqib haqida
- Janubiy Koreya termasining faol, tajovuzkor o‘ynashini bilardik. Koreyslarning butun jamoa bilan himoyalanib, tezkor qarshi hujumga o‘tishlarini ham. Afsuski, to‘pni ko‘pincha markazda boy berdik, ayni shu holat raqibimizga qo‘l keldi.
Qolaversa, koreyslar qarshi hujumlardan samarali foydalanishdi. Hisobda oldinda borsak, raqibga bunday imkoniyat bermaymiz aslo.
O‘rtoqlik uchrashuvlari haqida
- Takror aytaman, mashg‘ulotlar risoladagidek o‘tdi, talab darajasida ishladik, jamoani yaxshi sport formasiga olib chiqdik. To‘g‘ri, birgina jihatdan ko‘nglim to‘lmadi - o‘rtoqlik uchrashuvlari.
Meksikaliklarga qarshi o‘yinda vaziyatni o‘zgartira olishimizga ishongandik. Lekin uddalay olmadik. Shogirdlarimni ayblashim noo‘rin, chunki ular raqibga yetarli bosim o‘tkazib, vaziyatlar yaratishdi. Ammo samara yo‘q.
Nemis futbolining xira davri haqida
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
