18 iyun sanasidan e’tiboran ochiq deya e’lon qilingan transferlar oynasi bugun rasman yopiladi. 

Superliga hamda Pro-liga jamoalari mazkur vaqt davomida bir qator yangi futbolchilarni o‘z tarkiblariga qo‘shib olishga ulgurishdi. Bugun ham ba’zi klublar hali transferlar oynasi ochiq ekanidan foydalanib, yangi o‘yinchilar bilan shartnoma imzolashmoqda. 

Xususan, Navoiyning "Qizilqum" jamoasi transferlar oynasining so‘nggi kunlarida ham ancha faollik ko‘rsatmoqda. Navoiyliklar mavsumni Qozog‘istonning "Ordabasi" klubida boshlagan hamyurtimiz Ivan Nagayev bilan shartnoma imzolashdi. O‘zaro kelishuvga ko‘ra, 29 yoshli hujumchi mavsum so‘nggiga qadar "Qizilqum" sharafini himoya qiladi.

Shuningdek, "Qizilqum" "Spartak Toshkent" jamoasi tarbiyalanuvchisi Abdulaziz Samadovni ham o‘z safiga qo‘shib oldi va u bilan 1,5 yillik shartnoma imzolandi. 

Shu paytga qadar “Qizilqum” safida o‘ynab kelgan Nodirxon Kamolov esa jamoani tark etdi. Klub ushbu futbolchini o‘z o‘yinchilari ro‘yxatidan chiqardi. 

P.S.: Yangi futbolchilarni ro‘yxatdan o‘tkazish jarayoni soat 23:59gacha davom etadi. 16 iyul soat 00:00dan e’tiboran O‘zbekistonda transferlar oynasi rasman yopiladi.